चर्चित निर्देशक किशोर रानाका भाई रञ्जित रानाले निर्देशन गरेको पहिलो चलचित्र 'सहारा' चैत्र ४ गते शुक्रबारबाट राजधानीका हलहरूमा प्रदर्शन हुँदैछ । क्यू सिस्टमबाट प्रदर्शनमा हुने सो चलचित्र बिश्वज्योती, गंगा, कलंकी, गुण, गोपी, बाराही, पुष्पाञ्जलीलगायतका एक दर्जन भन्दा बढि हलमा लाग्नेछ ।
बिराज भट्ट, दिलिप रायमाझी, रमित ढुंगाना, रेखा थापा लगायतका मल्टिस्टार अभिनित सो चलचित्र करिब दुई बर्ष अघि मोफसलमा प्रदर्शन भईसकेको छ । मोफसलमा खासै राम्रो व्यापार गर्न नसकेपछि चलचित्रका निर्माता हरी भट्ट अहिले बेपत्ता छन् । चलचित्रका निर्माता भट्ट अहिले कहाँ छन् कसैलाई थाहा छैन । राजधानीमा प्रदर्शनको पालो आईसक्दा पनि निर्माता लामो समयदेखि सम्पर्कमा नआएपछि चलचित्रलाई बितरक मानन्धरले जिम्मा लिएर चलाउन लागेका हुन् ।
चलचित्र राम्रो बनेपनि प्रचार प्रसारको अभावले मोफसलमा चलचित्र असफल भएको बितरक मानन्धरको भनाई छ । मानन्धरले अहिले आफ्नै खर्चमा सो चलचित्रको प्रचारप्रसार गरिरहेका छन् । संगम फिल्मसको व्यानरमा निर्माण भएको सो चलचित्रमा महेश खड्काको संगीत तथा प्रदिप भारद्वाजको लेखन रहेको छ ।
