चलचित्र 'नाइ नभन्नु ल' बाट एकाएक चर्चामा आएका निर्देशक बिकाश आचार्यले तेस्रो चलचित्र 'म तिम्रो भईसकें' को निर्देशन गरिरहेका छन् । चलचित्रको गत फाल्गुन २७ गतेबाट छायाँकन शुरू गरिएको निर्देशक आचार्यले फिल्मीखबरलाई जानकारी दिए ।
बिकाशको लेखन, निर्माण तथा निर्देशन रहेको सो चलचित्रमा अधिकांश चलचित्रकर्मी 'नाइ नभन्नु ल' कै छन् । 'नाइ नभन्नु ल' का नायक जीवन लुईटेल र नायिका ऋचा सिंह ठकुरी सहित सो चलचित्रमा अयुब केसी र बालकलाकार बिज्ञान सापकोटाको मुख्य भुमिका निर्वाह गर्दैछन् । नेपालमा चलचित्र 'काठमाण्डू' पछि दोस्रो पटक रेड क्यामेराले छायाँकन गरिएको सो चलचित्रलाई शम्भु सापकोटाले खिच्दैछन् । वान टाईम सिनेमाको प्रस्तुती रहेको सो चलचित्रमा बसन्त सापकोटाको संगीत तथा हिमाल केसीको द्वन्द रहेको छ ।
पूर्णतया प्रेमकथामा आधारित सो चलचित्रको अहिले काठमाण्डौ वरपरका स्थानहरूमा छायाँकन गरिएको छ । काठमाण्डौ पछि सो चलचित्रको छायाँकन धरान, दोलखा, सिन्धुपाल्चोक लगायतका स्थानमा गरिने प्रोडक्सन म्यानेजर उत्तम केसीले जानकारी दिए । चलचित्रमा दुई गीत समावेश गरिएको छ । ती गीतहरूलाई दिपक लिम्बु र रजीना रिमालले गाएका छन् ।
चलचित्रको गीतसंगित 'नाइ नभन्नु ल' को भन्दा राम्रो बनेको निर्देशक आचार्यको भनाई छ । उनी भन्छन्,'नाइ नभन्नु ल का गीतलाई दर्शकस्रोताले जति मन पराईदिनु भयो त्यो भन्दा बढि यसका गीत मन पराउनु हुनेछ भन्ने आश गरेको छु ।' चलचित्र 'म तिम्रो भईसकें' पनि नाइ नभन्नु ल भन्दा धेरै गुणा स्तरिय बन्ने बिकाशको भनाई छ ।
स्मरण रहोस् निर्देशक आचार्यले 'नाइ नभन्नु ल' शिर्षक आफ्नो पहिलो चलचित्र 'नसिब आफ्नो' को गीतको बोलबाट राखेका थिए भने अहिले छायाँकनमा रहेको चलचित्र 'म तिम्रो भईसकें' चलचित्र 'नाइ नभन्नु ल' को शिर्ष गीतबाट राखेका हुन् ।
