एक्सन नायक बिराज भट्ट र नायिका रेखा थापाको पानी बाराबार भएको कुरा त सायदै थाहा नपाउने कोही छैन होला । हो अब बिराज र रेखा एकै चलचित्रमा एकसाथ अभिनय गर्न छोडी सकेका छन् । यहि चैत्र २५ गते सार्वजनिक हुन लागेको टंक लम्सालको चलचित्र 'प्रहार' नै यि दुईको अन्तिम चलचित्र हुनेछ ।
बिराज र रेखाको पहिलो भेट सोभित बस्नेतको चलचित्र 'दुर्गा' मा भएको थियो । तर जोडीको रूपमा भने यि दुईको भेट 'हिम्मत' मा नै भएको हो । रेखा फिल्म्सले 'हिम्मत' बाट बिराजको चर्चा एकाएक चुलाईदियो । त्यसपछि बिराज भट्टका दिन खुले । उनले भटाभट चलचित्रमा काम गर्ने मौका पाए । रेखा पनि खुसी थिईन् आफूले ब्रेक दिएको हिरोले चर्चा कमाउँदा । त्यसपछि रेखाले पनि बिराजलाई आफूले अभिनय गर्ने चलचित्रमा सिफारिस गर्दै आएकी थिईन् । तर जब यि दुईको सम्बन्धले मोड लियो त्यसपछि रेखालाई मन नपर्ने हिरो बिराज हुनपुगे । यता बिराज पनि के कम ? उनी पनि रेखाले अभिनय गरेका चलचित्रमा आफूले अभिनय नगर्ने अड्डी कस्न थाले ।
नायक निखिल उप्रेतीसँग पानी बाराबार भएपछि रेखाले बिराजलाई हिम्मतमा ब्रेक दिएकी हुन् । बिराज नं वान हिरो भएकै बेला रेखाले बिराजलाई आफ्नै होम प्रोडक्सनको चलचित्र 'हिफाजत' मा पनि लिने सुर कसेकी थिईन् । बुझ्नमा आए अनुसार बिराजले ३ लाख डिमाण्ड गरेपछि रेखाले बिराजको सट्टा आयुषलाई आफ्नो चलचित्रमा ब्रेक दिएकी हुन् । सोही चलचित्रबाट नै यि दुईको सम्बन्ध बिग्रिएको बुझिएको छ ।
बिराजसँग सम्बन्ध बिग्रिएपछि रेखा आयुषलाई स्थापित गर्न तर्फ लागिन् भने यता बिराज पनि रेखासँगको सम्बन्धमा दरार आएपछि नायिका जेनिशा केसीलाई सिफारिस गर्न तर्फ लागे । त्यसपछि त झन् यि दुईको सम्बन्धमा चट्याङ नै पर्यो । अब यि दुई एकसाथ काम गर्ने पक्षमा छैनन् । रोचक कुरा त यो छ कि टंक लम्सालको चलचित्र 'दोबाटो' नै रेखा र निखिलको अन्तिम चलचित्र थियो भने टंककै पछिल्लो चलचित्र 'प्रहार' बिराज र रेखाको अन्तिम चलचित्र बन्न पुगेको छ ।
के टंक लम्साल मिलेको जोडी फुटाउन माहिर भएका हुन् त ? अब टंकले निर्माण गर्ने अर्को चलचित्रमा रेखाले अभिनय गरिन् भने उनको जोडीको रूपमा आउने नायकसँगको सम्बन्धले कस्तो रूप लिन्छ होला त ? हामी त्यसको प्रतिक्षामा छौं ।
