दर्जनौं चलचित्रमा कुशल अभिनय कला प्रस्तुत गरिसकेका बहुप्रतिभाशाली कलाकार जयकिशन बस्नेतले अब चलचित्रको निर्देशन गर्ने भएका छन् । फिल्मीखबरलाई प्राप्त गोप्य जानकारी अनुसार उनी छिट्टै नै चलचित्रको निर्देशन गर्दैछन् ।
शनिबार राजधानीमा आयोजना गरिएको नयाँबर्षको शुभकामना आदान प्रदान कार्यक्रममा उनले निर्देशन गर्ने भनिएको चलचित्र 'बाईरोडको बाटोमा' को घोषणा गरियो । चलचित्रको नामसँगै संगीतकारको नाम घोषणा गरिएपनि निर्देशकको नाम भने घोषणा गरिएको थिईएन । तर फिल्मीखबरलाई एक बिश्वसनिय शुत्रले जयकिशनले सो चलचित्रको निर्देशन गर्न लागेको जानकारी गराएको हो ।
साजित महत र बिक्रम तामाङको निर्माणमा बन्न लागेको सो चलचित्रमा चेतन सापकोटाले संगीत दिने भएका छन् भने कलाकार र प्राबिधिकको छनोट भईनसकेको निर्माता साजित महतले जानकारी दिए । चलचित्रको घोषणा गरिएको सो साँस्कृतिक कार्यक्रममा चलचित्र नायकद्वय आर्यन सिक्देल र सुमन सिंहको साथमा छायाँकनमा रहेको चलचित्र आई एम सरीका निर्देशक दिनेश राउत, निर्माता हरि महत, संगीतकार ताराप्रकाश लिम्बु, निर्देशक सुरेश दर्पण पोखरेल, संगीतकार चेतन सापकोटा, निर्देशनको तयारीमा रहेका कलाकार जयकिशन बस्नेत लगायतको उपस्थिती थियो ।
कार्यक्रममा संगीतकार चेतन सापकोटाले एउटा गीत गाएका थिए भने कलाकार जयकिशन बस्नेतले केहि जोक्स भनेका थिए । यसैगरी कार्यक्रममा बिभिन्न चलचित्रका गीतमा आकर्षक नृत्य प्रस्तुत पनि गरिएको थियो । कार्यक्रमको सञ्चालन निर्देशक सुरेशदर्पण पोखरेलले गरेका थिए । कार्यक्रमलाई ओस्कार फिल्म्सले प्रस्तुत गरेको हो ।
