चलचित्र दर्पणछायाँबाट एकएक चर्चामा आएका नायक दिलिप रायमाझी एक कुशल अभिनेता हुन भन्नेमा कुनै दुई मत नहोला । उनको अभिनय र नृत्य कलाको तारिफ नगर्ने पनि सायदै भेटिंदैन ।
दिलिपले बिगतका थुपै सफल चलचित्रमा आफ्नो कुशल अभिनय कला प्रस्तुत गरिसकेका छन् । कुनै समय त दिलिपको चलचित्र रिजिल नभएको दिन नै हुन्थेन । तर बिचको समयमा आएर जस्तो पायो त्यस्तो चलचित्रमा अभिनय गर्दा र आफ्नो शरिरको वास्ता नगर्दा दिलिपको क्रेज घट्दै गएको थियो । अहिले उनी पुन: आफूलाई नयाँ स्वरूपमा ल्याउने कोसिसमा छन् । उनी आफैंले निर्माण गरेको चलचित्र 'मिस यू' प्रदर्शनको क्रममा छन् । जुन चलचित्र प्रदर्शन अगावै निकै चर्चामा पनि छ ।
यिनै कुशल अभिनेता दिलिप गत बर्ष प्रदर्शन भएको चलचित्र 'कस्लाई दिउँ यो जोवन' बाट तीन बिधामा मनोनित भएका छन् । यहि चैत्र २९ गते बितरण गर्ने भनिएको बक्स अफिस अवार्डमा अभिनेता रायमाझी सर्वोत्कृष्ट अभिनेता, खलपत्र र हाँस्यकलाकार गरी तीन बिधामा मनोनित भएका हुन् । सुरेशदर्पण पोखरेल निर्देशित सो चलचित्रमा अभिनेता दिलिप रायमाझी दोहोरो भुमिकामा प्रस्तुत भएका छन् । चलचित्रले खासै राम्रो व्यापार गर्न नसकेपनि चर्चा भने राम्रै पाएको थियो ।
यसरी एउटै कलाकार एउटै चलचित्रबाट तीन-तीन बिधामा मनोनित भएको सम्भवत नेपाली चलचित्रको इतिहासमा यो पहिलो पटक नै हुनुपर्छ । यसरी एकै चलचित्रबाट तीन-तीन बिधामा मनोनित भएका अभिनेता रायमाझीलाई बधाई र आगामी चलचित्र 'मिस यू' को पनि सफलताको कामना !
