नेपाली चलचित्र क्षेत्रका तीन मुख्य नायक शिब श्रेष्ठ, भुवन केसी र राजेश हमाल एकै समारोहमा कमै मात्र उपस्थित हुन्छन् । उनीहरूलाई एकै समारोहमा भेट्न साईत नै जुराउनु पर्छ भन्दा फरक नपर्ला । शुक्रबार साँझ राजधानीमा नायिका रेजिना उप्रेतीले यिनै तीन हस्तीहरूलाई एकै समारोहमा जम्काभेट गराउने काम गरिन् ।
नायिका रेजिना उप्रेतीले पहिलो पटक निर्माण गर्न लागेको चलचित्र 'वरदान' को शुभमुहुर्त कार्यक्रममा यि तीन हस्तीहरू उपस्थित भएका हुन् । कार्यक्रममा रेजिनाले सदाबहार नायक भुवन केसीलाई प्रमुख अतिथि बनाई भने एक्सन नायक शिब श्रेष्ठलाई बिशिष्ठ अतिथि बनाईन् । यसैगरी रेजिनाकै चलचित्रमा अभिनय गर्न लागेका महानायक राजेश हमाललाई पनि अतिथि बनाईएको थियो ।
कार्यक्रममा उपस्थित ति तीन हस्तीहरूले नायिका रेजिनालाई पहिलो पटक निर्माता बन्न लागेकोमा बधाई र शुभकामना दिए । यसैगरी सोही कार्यक्रममा अतिथिको रूपमा उपस्थित निर्माता संघका अध्यक्ष राजकुमार राई, साँस्कृतिक संघका महाप्रबन्धक नरेश पौड्याल, बरिष्ठ चलचित्रकर्मी युवराज लामा तथा कलाकार सुनिल थापाले रेजिनालाई बधाई र शुभकामना व्यक्त गरेका थिए । यसैगरी सो कार्यक्रममा दुई चर्चित नायिका करिष्मा मानन्धर र रेखा थापाको पनि उपस्थिती रहेको थियो । नायिका करिष्मा सो चलचित्रमा अभिनय गर्दै छिन् भने रेखाले चलचित्रको मुहुर्त सटको निर्देशन गरेकी थिईन् ।
रेजिना फिल्म्सको प्रस्तुतीमा रेजिना उप्रेती र कविता श्रेष्ठले निर्माण गर्न लागेको सो चलचित्रलाई शोभित बस्नेतले निर्देशन गर्दैछन् । चलचित्रमा महानायक राजेश हमाल, करिष्मा मानन्धर, रेजिना उप्रेती, मुकेश ढकाल, जयकिशन बस्नेत, लय संग्रौला, मोहन निरौला लगायतका कलाकारले अभिनय गर्दैछन् । मनोहर सुनामको संगीत रहने सो चलचित्रमा ध्रुब लम्सालको लेखन, राजेन्द्र खड्गीको द्वन्द, कृष्ण श्रेष्ठको छायाँकन तथा शिव विकको नृत्य रहने भएको छ ।
