पछिल्लो समयमा चलचित्र प्रोमोशनका लागि रिमिक्स र आईडम डान्स बनाउने क्रम बढ्दो छ । यहि क्रममा चलचित्र मालतीको भट्टीको प्रोमोशनका लागि रिमिक्स गीत तयार पारिने भएको छ । निर्माता प्रदिप उदयका अनुसार अडियो गीत तयार भईसकेको त भिडियो केहि दिनमा छायाँकन गरिने भएको छ ।

चलचित्रमा समाबेश गरिएको भट्टीको एक गीतलाई रिमिक्स गरेर चलचित्रको प्रोमोशनमा सो गीत प्रयोग गर्ने निर्माता उदयले जानकारी दिए । उनी अहिले सो गीतको करियोग्राफी गर्ने राम्रो निर्देशकको खोजीमा छन् । उनी भन्छन्, 'भने जस्तो निर्देशक पाए एक दुई दिनमै गीतको छायाँकन गर्छु  ।' गीत छिट्टै नै तयार गरिएपनि दर्शकले भने कहिले हेर्न पाउने हुन् त्यसको अत्तो पत्तो छैन । किनकी चलचित्रको प्रदर्शन मिती अझै तय भईसकेको छैन । चलचित्रको प्रदर्शन मिती तय हुनासाथ सो रिमिक्स गीत बिभिन्न टेलिभिजन, अनलाईन तथा रेडियोहरूमा घन्किने बताईएको छ ।

काबिल फिल्मसको लागि ब्रदर्श इन्टरटेनमेन्टको प्रस्तुती रहेको चलचित्र 'मालतीको भट्टी' मा रेखा थापा, जीवन लुइँटेल, नन्दिता केसी, अयुव केसी, सुनील थापालगायतको अभिनय रहेको छ । चलचित्रलाई गणेश देव पाण्डेले निर्देशन गरेका हुन् । नारायण कुमार पाण्डे 'काबिल', गंगा पौडेल र गोपाल पाण्डेले निर्माण गरेको सो चलचित्रमा संजय लामाको छायाँकन, रोशन श्रेष्ठको द्वन्द, रेनाशा राईको नृत्यनिर्देशन तथा कालीप्रसाद बाँस्कोटाको संगीत सुन्न सकिनेछ । सो चलचित्रमा नायिका थापा भट्टी वालीको भुमिकामा छिन् ।