छोटो समयमा नै नेपाली चलचित्र क्षेत्रमा आफ्नो राम्रो पहिचान बनाउन सफल चक्लेटी नायक अझ यसो भनौं किसर नायक मुकेश ढकालको आज जन्मदिन परेको छ । बिसं २०३६ साल बैशाख ९ गते जन्मेका नायक ढकालको तिथीले आज जन्मदिन हो भने मितीले भोली । उनी आजबाट ३२ बर्षका भएका छन् ।
उनले आज आफ्नो जन्मदिन छायाँकनमा रहेको चलचित्र 'हाम्रो माया जुनी जुनीलाई' को युनिटसँग सेलिब्रेट गर्दैछन् । सो चलचित्रको अहिले तेलकोटमा क्लाईमेक्सको छायाँकन भईरहेको छ । दिन भरीनै छायाँकनमा व्यस्त हुनुपर्ने भएकाले परिवारसँग भने साँझ मात्र उनले आफ्नो जन्मदिन सेलिब्रेट गर्ने बताए । उनी भन्छन्, 'जन्मदिन राम्रै गरी मनाउने सोच थियो तर सुटिङका कारणले त्यो सोच पूरा हुन सकेन ।'
करिब तीन बर्ष अघि चलचित्र 'जीवनदाता' मा आईटम गीतमा डान्स गरेर आफ्नो अभिनय यात्रा शुरू गरेका मुकेशले सोही समयमा एक बंगाली चलचित्र 'मायर आँचल' मा अभिनय गरे । तर उनले नायक भएर अभिनय गरेको पहिलो नेपाली चलचित्र भने 'हलचल' हो । हलचलमा राम्रो अभिनय गरेपछि उनीमाथी थुप्रै निर्माता निर्देशकको आँखा पर्यो । त्यसपछि उनले अहिले सम्म १० वटा चलचित्रमा अभिनय गरिसकेका छन् । हलचल, आफ्नो मान्छे आफ्नै हुन्छ, निगरानी, मनमनै मन पराएँ, दुलही, श्रीमान श्रीमती, हाम्रो माया जुनी जुनीलाई लगायतका चलचित्रमा अभिनय गरेका मुकेश शुक्रबारबाट रेजिना उप्रेतीको चलचित्र 'वरदान' मा व्यस्त हुँदैछन् ।
राम्रो अभिनय गर्न सक्ने यि नायकले नायिका मेलिना मानन्धरसँग २०६६ साल असोज १४ गते प्रेम बिबाह गरेका हुन् । उनीहरूको पहिलो भेट भने बंगाली चलचित्र 'मायर आँचल' को छायाँकनका क्रममा भएको हो । सो चलचित्रमा एकसाथ अभिनय गरेका यि जोडीको प्रेमका मुना सोही बेलाबाट नै पलाएको हो । उनीहरूले आफ्नो प्रेमको उपहारको रूपमा २०६७ साल कार्तिक २८ गते छोरीलाई जन्म पनि दिईसकेका छन् ।
रजतपतमा राम्रो अभिनय क्षमता भएका नायक ढकाललाई फिल्मीखबर डटकम परिवारको तर्फबाट जन्मदिनको साथसाथै अभिनय यात्रामा अझै सफलता मिलोस् भन्ने शुभकामना !
