केहि बर्ष अघिको निकै सफल जोडीको रूपमा राजेश हमाल र करिष्माको जोडीलाई चिनिन्छ । यो जोडीको चलचित्र आएपछि दर्शकहरू निकै खुसी हुन्थे । तर पछिल्ला बर्षहरूमा करिष्माले राजेशलाई धोका दिएपछि दर्शकहरूले यो जोडीलाई पर्दामा हेर्न पाएको छैन । अभिनेत्री करिष्मा मानन्धर चलचित्र क्षेत्रलाई लात मारेर अमेरिका प्रस्थान गरेपछि यो जोडीको फुट भएको हो ।
केहि बर्ष अमेरिका बसेर अभिनेत्री करिष्मा मानन्धर दुई बर्ष अघि नेपाल आईन् र महानायक राजेश हमालसँग पुन: जोडिईन् । अहिले फेरि रजतपटमा राजेश र करिष्माको जोडी हराएको चर्चा छ । सबैले यो जोडी कता हरायो भनेर सोच्दै छन् । हो, लामो समयपछि यो जोडी चलचित्र 'हो यहि हो माया' मार्फत पर्दामा देखिन लागेका थिए तर सो चलचित्रको अहिले केहि अत्तोपत्तो छैन । दुई बर्ष अघि छायाँकन गरिएको उक्त चलचित्र के कारणले अड्किएको छ कसैलाई थाहा छैन ।
चलचित्रको बजेट बढेको र निर्मातासँग अब खर्च गर्ने पैसा नभएकोले सो चलचित्र ल्याबमै अड्किएको बुझिएको छ । दिपक श्रेष्ठ निर्देशित सो चलचित्रको प्राबिधिक कार्य पनि सकिएको छैन र सो चलचित्र छिट्टै आउने छाँट पनि देखिएको छैन । किनकि निर्देशक श्रेष्ठ अहिले वीर चलचित्रको छायाँकनमा व्यस्त छन् र वीर सकिए लगत्तै उनी रेखा थापाको चलचित्रमा व्यस्त हुने सम्भावना देखिएको छ ।
लामो समयपछि चलचित्रमा अभिनय गर्न पाएकोमा अभिनेत्री मानन्धर निकै खुसी थिईन् । तर उनको खुसी अहिले हराएको छ । करिष्मा मात्र हैन अन्य कलाकार राज तिमल्सिना, जिया केसी र प्राबिधिक पनि चलचित्रको प्रदर्शन हुने छाँट नदेख्दा दु:खी देखिएका छन् । के अब यो चलचित्रलाई दर्शकले हेर्न नपाउने त ? यो प्रश्न चलचित्रका निर्देशक र निर्मातालाई ।
