बिश्व सम्पदा सुचिमा रहेको पर्यटकीय तिर्थस्थल लुम्बिनी स्थित मायादेबिको मन्दिरमा परेवा उडाएर चलचित्रको मुहुर्त गरिएको छ । सार मुभिजको व्यानरमा निर्माण हुन लागेको चलचित्र 'अन्दाज' को मुहुर्त परेवा उडाएर गरिएको हो ।
चलचित्र 'अन्दाज' का युनिटको साथमा सोही क्षेत्रका केहि प्रमुख व्यक्तिहरूको उपस्थितीमा चलचित्रको मुहुर्त गरिएको निर्माता छबि ओझाले फिल्मीखबर डटकमलाई जानकारी दिए । चलचित्रको छायाँकन आजै गीतबाट शुरू गरिएको छ । मन्दिर परिसरमा रेखा थापा र जीवन लुईटेललाई कविराज गहतराजले नचाउँदैछन् ।बिहिबार लुम्बिनी पुगेको युनिटले बिहान मुहुर्त गरि छायाँकन शुरू गरेको हो ।
उज्जवल घिमिरेले निर्देशन गर्न लागेको सो चलचित्रमा रेखा थापा, जीवन लुईटेल र सबिन श्रेष्ठको मुख्य भुमिका रहनेछ । प्रेम कथामा आधारित रहेर निर्माण गर्न लागिएको सो चलचित्रमा बसन्त सापकोटाको संगीत, कविराज गहतराज र शंकर बिसीको नृत्य, बिष्णु कल्पितको छायाँकन तथा राजेन्द्र खड्गीको द्वन्द रहने छ । चलचित्रको कथा सुबास सिंह बस्न्यातले लेखेका हुन् । चलचित्रलाई छबि ओझा, अशोक शर्मा र उज्जवल घिमिरेले संयुक्त रूपमा लगानी गर्दैछन् ।
लुम्बिनीमा करिब एक साता सम्म छायाँकन गरेर युनिट चितवन जाने निर्माता ओझाले जानकारी दिए । चितवनमा केहि सिन खिचेर युनिट सिन्धुली हुँदै काठमाण्डौमा आएर छायाँकन गर्ने निर्माता ओझाको भनाई छ ।
