चलचित्र निगरानीलाई दर्शकले निगरानी गरेपछि निर्माता शुसिल पोखरेल अहिले अर्को चलचित्र 'जय शिब शंकर' को प्रचार प्रसारमा लागि परेका छन् । उपत्याका बाहिर राम्रै सफलता पाएर राजधानीमा बर्ष दिन देखि पालो कुरेर बसेको यो चलचित्र आगामी शुक्रबार रिलिज हुने भएको छ ।
बैशाख ३० गतेबाट बिश्वज्योती, गंगा, गोपीकृष्ण, गुण, कलंकी, बाराही लगायतका करिब एक दर्जन सिनेमा घरमा प्रदर्शन हुन लागेको 'जय शिब शंकर' मल्टिस्टार चलचित्र हो । यसमा रजतपतका एक्सन नायक राजेश हमाल, निखिल उप्रेती र बिराज भट्टको अभिनय रहेको छ । राजेन्द्र उप्रेतीद्वारा निर्देशित सो चलचित्रमा यि तीन नायकको साथमा सञ्चिता लुईटेल, राजेश ढुंगाना, मिथिला शर्मा, रेजीना उप्रेती, पूजना प्रधान लगायतले अभिनय गरेका छन् ।
आफ्नो चलचित्रमा मल्टिस्टार रहेकाले दर्शकले निगरानी भन्दा बढि रूचाउन सक्ने बिश्वास निर्माता पोखरेलले लिएका छन् । उनी भन्छन्, 'मेरो यो चलचित्र हरेक पक्षबाट राम्रो छ । त्यसैले पनि यसले दर्शकलाई खुसी पार्न सक्छ ।' बिकाश आचार्यको लेखन रहेको एक्सन प्रधान चलचित्र 'जय शिब शंकर' मा हिमाल केसीको द्वन्द, शम्भु सापकोटाको छायाँकन रहेको छ । यो चलचित्र तीन बर्ष अघि छायाँकन गरिएको हो ।
