प्रदर्शनको मिती नजिकिंदै गर्दा प्रचारप्रसारलाई तिब्रता दिन चलचित्र 'काठमाण्डू' को भिडियो गीत औपचारिक रूपमा पहिलो पटक फिल्मीखबर डटकमबाट सार्वजनिक गरिएको छ । यस अघि फिल्मीखबरले नै पहिलो पटक सो चलचित्रको प्रोमो सार्वजनिक गरेको थियो ।
बिशेष गरी ग्लोबल मार्केटलाई ध्यानमा राखेर र फिल्मीखबरको लोकप्रियतालाई मध्यनजर गर्दै गीत अनलाईनको माध्यमबाट पहिलो पटक सार्वजनिक गरिएको चलचित्रका निर्देशक तथा नायक आकाश अधिकारीले बताए । सार्वजनिक गरिएको 'क्रेजी गर्ल...' बोलको गीतमा राहुल प्रधानको संगीत, आकाश अधिकारीको गीत तथा सुनिधी चौहान र आदित्य नारायणको स्वर रहेको छ । अमेरिकामा छायाँकन गरिएको सो गीतमा आकाश अधिकारी र रीया मार्फी नृत्य गरेका छन् । सो गीतको करियोग्राफी पनि आकाश स्वयंले गरेको बताए ।
युरोपका बिभिन्न मुलुक तथा अमेरिका र क्यानडामा रिलिज भईसकेको चलचित्र 'काठमाण्डू' छिट्टै नै इजरायलमा पनि रिलिज गरिंने निर्देशक अधिकारीले जानकारी दिए । यसै गरी बिश्वका अन्य मुलुकबाट पनि रिलिजको प्रस्ताव आएकोले समय मिलाएर ति मुलुकमा पनि जाने आकाशको भनाई छ । नेपालमा भने यो चलचित्र २/३ महिना भित्रमा सार्वजनिक भईसक्ने छ । लामो समय देखि काठमाण्डूलाई कुरेर बसेका नेपालका दर्शकहरूका लागी चाँडै नै रिजिल गर्न लागिएको बताउँदै आकाश भन्छन्, 'धेरै समय भयो रिलिज हुँदैछ भनेको अब त साँच्चिकै छिट्टै नै रिलिज गर्दैछौं ।'
बेन नबिन अधिकारीसँग मिलेर आकाश अधिकारीले निर्माण एवं निर्देशन गरेको चलचित्र 'काठमाण्डू' मा जेनेरेशन ग्यापका साथमा काठमाण्डौमा बढ्दो रूपमा रहेका बिभिन्न समस्या, बिकृती बिसंगतीलाई प्रमुखताका साथ प्रस्तुत गरिएको छ । काठमाण्डौको जीवनशैलीलाई अमेरीकासँग दाँजिएको यो चलचित्रमा आकाशको साथमा प्राप्ती घिमिरे, रिया मार्फी, रेश मरहठ्ठा, गौरी मल्ल, संयुक्ता राणा, नबिन अधिकारी, ममता प्रधान, सुनिल दत्त, अर्जुन श्रेष्ठलगायतले अभिनय गरेका छन् ।
स्काई मुभिजको ब्यानरमा निर्माण गरिएको सो चलचित्रको छायाँकन अमेरिका र काठमाण्डौमा गरिएको हो । चलचित्रलाई नेपालमा पहिलोपटक रेड ४ क्यामेराले खिचिएको हो भने छायाँकन दिर्घ गुरूङले गरेका हुन् । चलचित्रका सबै गीतमा भारतिय चर्चित गायक गायिकाले स्वर दिएका छन् भने सबै गीतमा संगीत राहूल प्रधानकै रहेको छ ।
सार्वजनिक गरिएको गीत हेर्न तलको लिङ्कमा क्लिक गर्नुहोला ।
