चलचित्र निर्माण गरेर दर्शकको मन जित्न सफल कलाकार शुलेमान शंकर (इकु) ले निर्माण गरेको अर्को चलचित्र 'इकु ब्याक अगेन' को अहिले राजधानीको अनामनगर स्थित सफ्ट इमेजमा डबिङ कार्य भईरहेको छ ।
एसएमएस फिल्मसको ब्यानरमा सागर लामिछानेले निर्देशन गरेको सो चलचित्र दशैंको अवसर पारेर सार्वजनिक गर्ने तयारी भईरहेको निर्माता तथा चलचित्रमा मुख्य नायक सुलेमानले फिल्मीखबरलाई जानकारी गराए । खासगरी बालबालिकालाई लक्षित गरेर इकु निर्माण गरेका सुलेमानले यसपटक भने सबै वर्गलाई लक्षित गरेर चलचित्र निर्माण गरेको बताए । इकुमा मान्छेको बस्तीमा संवेदना हराए पनि जंगलमा संवेदना मरेको छैन भन्ने कुरा समेटिएको थियो भने यस चलचित्रमा जंगल र सहर दुवैलाई जोड्ने कथा समेटिएको उनको भनाई छ ।
चलचित्रमा सुलेमानलाई उनकै जीवनसंगिनी जयाशंकरले साथ दिएकी छिन् । यसका साथमा क्याराभान हिरो थिन्ले लोन्डुप लामाले पनि मुख्य भुमिका निर्वाह गरेका छन् । यस अघि इकुमा पब्लिसिटी सहित २२ लाख खर्च गरिएको थियो भने यो फिल्ममा ५५ लाखको बजेट छुट्टाइएको सुलेमान बताउँछन् । चलचित्रको अधिकांश भागको छायाँकन भक्तपुरको सूर्वविनायक जंगलमा गरिएको छ । चलचित्रको छायाँकन पुरूषोत्तम प्रधानले गरेका हुन् ।
