निर्माता तथा नायक रोज राणाले आफ्नो पछिल्लो चलचित्र 'म छु नि तिम्रो' को पोस्टरलाई औपचारिक रूपमा पहिलो पटक फिल्मीखबर डटकम मार्फत सार्वजनिक गरेका छन् । पोस्टर सार्वजनिकसँग उनले चलचित्रको प्रचार प्रसार शुरू भएको बताए ।
चलचित्र 'म छु नि तिम्रो' भदौ महिनामा सार्वजनिक गर्ने तयारी गरिएको बताउँदै प्रचार प्रसारलाई तिब्र पार्न केहि दिन भित्रमा गीत पनि सार्वजनिक गर्ने रोजले फिल्मीखबरलाई जानकारी दिए । उनले भने, 'अडियो गीत १/२ दिनमा सार्वजनिक गर्नेछौं भने भिडियो गीत एक साता भित्रमा सार्वजनिक गर्नेछौं ।' दादागिरी, खलनायक, डन, दोस्ती जस्ता एक्सन प्रधान चलचित्र निर्माण गरेका रोजको यो दोस्रो लभस्टोरी चलचित्र हो । उनले यस अघि 'टक्कर दुई मुटुको' नामक चलचित्र निर्माण गरेका थिए जुन चलचित्रको गीत निकै हिट पनि भएको थियो ।
मदन घिमिरेले निर्देशन गरेको सो चलचित्रको अहिले बालाजु ल्याबमा सम्पादन कार्य भईरहेको छ । सोफिया सिने आर्टसको प्रस्तुतीमा निर्माण गरिएको सो चलचित्रमा रोज राणा, आयुष रिजाल र सौजन्य सुब्बाको मुख्य भुमिका रहेको छ । मौनता श्रेष्ठको कथा रहेको सो चलचित्रमा चेतन सापकोटा र बसन्त सापकोटाको संगीत, एनबी महर्जनको द्वन्द तथा कविराजको नृत्य रहेको छ ।
करिब एक बर्ष अघि मानव बेच बिखन बिरूद्वको अभियोगमा जेल परेका राणाले अदालतबाट सफाई पाएपछि 'म छु नि तिम्रो' को निर्माण कार्य शुरू गरेका हुन् । चलचित्र 'म छु नि तिम्रो' रिजिल गरे लगत्तै आफ्नै निर्देशनमा 'ग्याङस्टार' नामक एक्सन प्रधान चलचित्रको निर्देशन गर्ने रोजले बताए ।
