नयाँ चलचित्रका लागि कलाकार खोज्नु कुनै नौलो कुरा हैन । अहिले अधिकांश निर्माता निर्देशकहरू आफ्नो चलचित्रका लागि कलाकारको खोजी गरिरहेका हुन्छन् । यस्तै केहि समय अगाडी एक निर्माताले आफ्नो नयाँ चलचित्रका लागि दिमाग भएका हिरो हिरोईन् चाहियो भन्दै फेसबुकमा लेखेका थिए । अहिले त्यहि परम्परालाई निरन्तरता दिँदै अर्का एक निर्माताले पनि फेसबुकबाट नै आफूलाई नयाँ हिरो चाहिएको कुरा उल्लेख गरेका छन् ।

हिरो त चाहियो तर कस्तो ? निर्माता शुसिल पोखरेल भन्छन्, 'राम्रो डान्स , अभिनय, फाईट गर्न सक्ने र राम्रो बडि भएको ह्याण्डसम केटाको खोजीमा छु ।' बलिउड नायक ऋतिक रोशन उदाहरण दिंदै शुसिल थप्छन्, 'ऋतिक जस्तै केटा भेटें भने चलचित्रको काम शुरू गरिहल्छु ।' यसरी सर्वगुण सम्पन्न केटा भेटिएला त ? शुसिल बिश्वासका साथ भन्छन्, 'नेपालमा ऋतिक भन्दा पनि राम्रा कलाकारहरू छन् तर हामी तिनीहरूको खोजी गर्नुपर्छ ।'

निर्माता शुसिल पोखरेल

शुसिल नायक मात्र हैन नायिका पनि नयाँ नै राख्ने योजनामा छन् । उनी भन्छन्, 'पहिला हिरोको खोजी गर्छु त्यसपछि मात्र हिरोईनको । त्यसो भए हिरोईन कस्ती त ? उनी भन्छन्, 'हिरोईन पनि सर्वगुण सम्पन्न नै हुनुपर्छ । ' तर शुसिलले हिरोईनलाई भने हिरो जस्तो प्राथमिकतामा नराखेको बताए । उनले हिरोईन भनेजस्तो नपाए पूरानै भए पनि लिने बताउँछन् । उनी भन्छन्, 'हिरोको जोडी सुहाउँदो पुरानै हिरोईन भए पनि हुन्छ तर हिरो नयाँ नै चाहिन्छ ।'
 

पुराना कलाकारमा त्यो खुबी नभएर नयाँको खोजी गरेको हो त ? शुसिल भन्छन्, 'मैले खोजेको जस्तो कलाकार रजतपटमा नभएर नै नयाँ अनुहारको खोजी गरेको हुँ ।'' नेपालमा पैसा हालेर कलाकार हुने परम्परा भएकोले राम्रा कलाकार चलचित्र उधोगमा आउन नसकेको कुरा व्यक्त गर्दै शुसिल आफू भने नयाँलाई उचित पारिश्रमिक सहित कामको अवसर दिने बताउँछन् । हुनत शुसिलले भने जस्ता कलाकार नभेटिने हैनन् तर समय भने धेरै नै लाग्न सक्छ । त्यसैले त शुसिल भन्छन्, 'भने जस्तो कलाकार नपाए चलचित्रको काम नै पोस्टपोण्ड गर्छु ।'

शुसिलले खोजेको कलाकार एक्सन प्रधान चलचित्र 'बडिगार्ड' का लागि हो । जसको निर्देशन राजेन्द्र उप्रेतीले गर्ने पक्का नै भएको छ । राजेन्द्रले यस अघि शुसिलकै दुई चलचित्र 'जय शिब शंकर' र 'निगरानी' निर्देशन गरिसकेका छन् । २०५४ साल देखि निरन्तर रूपमा चलचित्र निर्माण गर्दै आएका शुसिलले 'परदेशी', 'मैदान', 'जीबनदाता', 'आँधी-तूफान', 'जय शिब शंकर' र 'निगरानी' निर्माण गरिसकेका छन् । अब उनी 'बडिगार्ड' को निर्माण गर्ने तयारीमा जुटेका छन् ।