२०५८ सालमा खरको छानोमा नायक भएर कलिउड छिरेका गायक तथा संगीतकार कमल कृष्णले चलचित्रको निर्देशन गर्ने भएका छन् । दुई दर्जन भन्दा बढी चलचित्रहरूमा खलपात्रको अभिनय गर्दै आएका कमल कृष्णले निर्देशन गर्ने चलचित्रको नाम हो 'आई लभ यु टु' ।
सेन्चुरी फिल्मस्को ब्यानरमा ओमबहादुर विश्वकर्माले निर्माण गर्ने सो चलचित्रमा रेखा थापा, कमल कृष्ण, दीपक क्षेत्री, हरि हुमागाईं लगायतले अभिनय गर्ने भएका छन् । यसै चलचित्रबाट निर्मल सेन्चुरीले नायकको रूपमा डेब्यू गर्दैछन् । निर्मल सो चलचित्रमा रेखा थापाको जोडी भएर देखिने छन् । पछिल्लो समयमा नायकको खोजी भईरहेको बेला कमल कृष्णले आफ्नो चलचित्रको लागी सुहाउँदो नायक भेटेको दाबी गरे । उनले भने, 'मेरो चलचित्रमा निर्मल कथा अनुसार फिट छन् ।'
असार पहिलो साताबाट नेपाल र सिक्किमका बिभिन्न स्थानमा छायाँकन सुरु हुने भनिएको सो चलचित्रमा निर्देशक कमल कृष्णको संगीत, नायिका रेखा थापा, खुशी पौडेल, मीन थापा र कमल कृष्णको गितगीत रहने छ । यसैगरी चलचित्रमा देब महर्जनको द्वन्द्व र प्रकाश पुरीको कथा रहने छ ।
