जय किशन बस्नेतको प्रस्तुतीमा द्वन्दनिर्देशक एनबि महर्जनले निर्देशन गर्न लागेको चलाचित्र 'पार्टनरको मुहर्त स्वयम्भू स्थित सरस्वती मन्दिरमा गरियो । शनिबार बिहान केहि सिमित चलचित्रकर्मीका माझ सो चलचित्रको मुहर्त गरिएको हो ।
चलचित्रको मुहर्त सटको निर्देशन दिपक रायमाझीले गरेका थिए भने क्यामरा स्विच अन पत्रकार शान्ति प्रियले गरेका थिए । यसैगरी क्ल्यापको जिम्मा निर्देशक शोभित बस्नेतलाई दिईएको थियो भने नरिवल निर्माता रामभक्त श्रेष्ठले फुटाएका थिए । चलचित्रको मुहर्त सट नायिका रेजिना उप्रेती र नायक अर्जुन कार्कीले दिएका थिए ।
यस अघि नायक अर्जुन कार्कीको चलचित्र 'बजार' निर्देशन गरेका महर्जनले निर्देशन गर्ने सो चलचित्रलाई मदन ताम्राकारले निर्माण गर्न लागेका हुन् । रेण्डी फिल्मस् प्रालिको व्यानरमा निर्माण हुने सो चलचित्रमा अर्जुन कार्की, रेजिना उप्रेती, राजेश ढुंगाना, जयकिशन बस्नेत, दिनेश डिसी, दिनेश शर्मा, शोभित बस्नेत, ज्योत्सना भट्ट, जेसिका खड्का लगायतका कलाकारहरूले अभिनय गर्दैछन् । प्रेमकथाको साथमा थ्रिलर चलचित्र भनिएको चलचित्र 'पार्टनर' को छायाँकन दुई दिन पछि काठमाण्डौमा नै गरिने भएको छ ।
चेतन सापकोटा र मनोजराज भण्डारीको संगीत रहने सो चलचित्रमा गणेश श्रेष्ठको छायाँकन रहने छ भने चलचित्रको कथा प्रस्तुतकर्ता तथा कलाकार जयकिशन बस्नेतकै रहेको छ ।
