हाल राजधानीमा धमाधम छायाँकन भईरहेको कबिता श्रेष्ठको चलचित्र 'प्लान' बाट नायिका रूष्मा राई आउट भएकी छिन् । उनको ठाउँमा दिलिप रायमाझीकी साली अनिता दाहाल इन भएकी छिन् । चलचित्र सायदबाट डेब्यू नायिका अनिताको यो दोस्रो चलचित्र हो ।
मुहुर्त समारोहमा सिक्किमे नायिका रूष्माले अभिनय गर्ने बताईएको भएपनि छायाँकन शुरू भएको करिब एक साता पछि उनलाई हटाएर अनितालाई राखिएको हो । निर्देशक शोभित बस्नेतसँग केही ठाकठुक परेपछि रूष्मालाई हटाईएको खबर बाहिर आएपनि नायिका रूष्माले भने आँफै सो चलचित्रमा अभिनय नगर्ने बुझिएको छ । रूष्माको सहयोगमा सिक्किममा सो चलचित्रको छायाँकन गर्ने तयारी भईरहेकोले अभिनय गर्दा सिक्किममा छायाँकनको व्यवस्था मिलाउन नभ्याउने हुनाले रूष्माले चलचित्र छोडेको बुझिएको छ ।
स्रोतका अनुसार सिक्किममा छायाँकन गर्दा धेरै कागजी प्रक्रिया पुरा गर्नुपर्ने भएकोले अभिनयमा समय दिन नसकोले उनको स्थानमा अनितालाई राखिएको हो । आफूहरू बिच कुनै ठाकठुक नभएर सम्झौतामा रूष्माको ठाउँमा अनितालाई लिएको निर्देशक बस्नेतको भनाई छ । उनका अनुसार सो चलचित्रमा रूष्माले अतिथीको भुमिका निर्वाह गर्नसक्ने छिन् । रूष्माले यसअघि निर्देशक बस्नेतसँग जंगबाज, मिसन लभ इन सिक्किम जस्ता चलचित्रमा काम गरिसकेकी छिन् ।
डीजेहरूको अन्तरद्वन्द्वलाई मुख्य कथाबस्तु बनाएर निर्माण शुरू गरिएको सो चलचित्रमा अनिताको साथमा राजेश हमाल, मुकेश ढकाल, अनुष्का ढकाल, सुनिल थापा, मोहन निरौला, शोभित बस्नेत, ध्रुव न्यौपाने लगायतले अभिनय गर्दैछन् । सलोन फिल्म्सको प्रस्तुतीमा निर्माण शुरू गरिएको सो चलचित्रमा दिनेश न्यौपानेको लेखन, राजेन्द्र खड्गीको द्वन्द, प्रमोद ढुंगानाका गीत, राम श्रेष्ठको संगित, शिव बिकको नृत्य तथा कृष्ण श्रेष्ठको छायाँकन रहने छ ।
