बरिष्ठ चरित्र अभिनेत्री शुभद्रा अधिकारीले दुई लाखको अक्षय कोषको स्थापना गरेकी छिन् । चलचित्रकर्मीहरूको साहयोगार्थ स्थापना गरिएको सो अक्षय कोषमा जम्मा गरिएको रकमबाट आउने व्याजले हरेक बर्ष एक जनालाई सम्मान सहित केहि नगद प्रदान गरिने अभिनेत्री अधिकारीले जानकारी गराईन् ।
यसरी सम्मान गर्ने क्रममा शनिबार राजधानीमा एक कार्यक्रमको आयोजना गरि अभिनेत्री अधिकारीले आफ्नै गुरू भैरब बहादुर थापालाई नगद रू २५ हजार 
सहित ताम्रपत्रले सम्मान गरिन् । ६ दशक लामो अभिनय यात्रा पार गरेकी अभिनेत्री अधिकारीले प्रधानमन्त्री झलनाथ खनालको हातबाट थापालाई सम्मान गरेकी हुन् । आफ्ना गुरूलाई सम्मान गर्न पाउँदा निकै खुसी भएकी अधिकारीले आफ्ना पति स्व. कृष्णबहादुर, आमा स्व. नुरादेवी र नृत्य गुरू बद्री उस्तादलाई समर्पण गर्दै सो अक्षय कोषको स्थापना गरेको बताईन् ।
यता चेलीबाट सम्मानित भएका थापाले अधिकारीको कामको कदर गर्दै आगामी दिनमा अझ राम्रा स्रस्टालाई सम्मान गर्न शुभकामना दिए । यस्तै प्रधानमन्त्री झलनाथ खनालले पनि अभिनेत्री अधिकारीले चालेको कदमको प्रसंसा गरे । देशको कलासंस्कृति नजोगिएसम्म आफ्नो पहिचान नजोगिने भन्दै प्रधानमन्त्री खनालले आउँदो बजेटमा कलासंस्कृति जोगाउने कामलाई प्रमुख प्राथमिकतामा राख्ने बताए । कार्यक्रममा उपस्थित चलचित्रकर्मी तथा स्रस्टाहरूले अभिनेत्री अधिकारीले चालेको कदमको प्रसंसा गरेका थिए ।
