नायिका नम्रता श्रेष्ठ आजबाट २६ बर्षमा प्रवेश गरेकी छिन् । बिस २०४३ साल जेष्ठ ३१ गते अर्थात आजकै दिन बाबु देबेन्द्र श्रेष्ठ र आमा बेला श्रेष्ठको कोखबाट धरानमा जन्मेकी नम्रताको जन्मदिन आज भएपनि उनले भोली मात्र आफ्नो जन्मदिन सेलिब्रेट गर्ने भएकी छिन् ।
सानै उमेर देखि अभिनयमा रूचि रहेको बताउने नम्रताले कक्षा १ मा पढ्दै गर्दा संगिनी नामक भिडियो चलचित्रमा बालकलाकार भएर अभिनय गरेकी थिईन् । तत्कालिन समयका चर्चित नायक सरोज खनाल, नायिकाद्वय दिपा श्री निरौला र रूपा रानासँग बालकलाकारको रूपमा अभिनय गरेकी नम्रताले नायिका भएर अभिनय गरेको पहिलो चलचित्र भने 'सानो संसार' हो । जुन चलचित्रलाई आलोक नेम्वाङले निर्देशन गरेका थिए ।
सन् २००३ बाट मोडलिङ यात्रा तय गरेकी नम्रता म्युजिक भिडियो हुँदै चलचित्रको रंगीन दुनियाँमा प्रवेश गरेकी हुन् । प्रमोद उपाध्यायको जादू नामक
एल्बममा रहेको गीतबाट म्युजिक भिडियोको यात्रा थालेकी नम्रताले अहिलेसम्म ३७ वटा जति म्युजिक भिडियो र थुप्रै बिज्ञापनमा काम गरिसकेकी छिन् । म्युजिक भिडियोमा अभिनय गर्दा देखिनै एउटा सम्भावना बोकेको कलाकारको रूपमा आंकलन गर्न थालिएकी नम्रताले अहिले सम्म 'सानो संसार', 'मेरो एउटा साथी छ' र 'मिस यू' मा अभिनय गरिसकेकी छिन् ।
चलचित्र 'मेरो एउटा साथी छ' पछि बिभिन्न कारणले चलचित्रमा नदेखिएकी नम्रतालाई चलचित्र 'मिस यू' बाट निर्देशक सुरेशदर्पण पोखरेलले पुनरागमन गराएका हुन् । आफूले चलचित्र 'मिस यू' बाट निकै आश गरेको बताउने नम्रताले आज आफ्नो जन्मदिन भोलीमात्र साथीहरूसँग सेलिब्रेट गर्ने भएकी छिन् । भोली जन्मदिन कसरी मनाउने भन्ने बारे अझै केहि योजना नबनाएको नम्रताले बताईन् ।
नम्रताले जन्मदिन जसरी मनाएपनि फिल्मीखबर डटकम परिवार उनको उत्तरोत्तर प्रगतीको कामना गर्दै जन्मदिनको शुभकामना दिन चाहन्छ । ह्याप्पी बर्थ डे नम्रता !
