कतिपय कलाकारको मनमा आफ्नो चलचित्रमा किस सिन होस् भन्ने चाहना होला । कतिले सिनलाई पर्फेक्ट र रियल देखाउन बारम्बार रिटेक पनि दिन्छन् भने कति किस सिन भनेपछि डराउँछन् पनि । कतिले किस सिनलाई सहर्स स्विकार्छन् त कतिले इन्कार नै गर्छन् । यहि किस सिनको झमेलामा नवनायिका बेनिशा हमाल पनि परेकी छिन् त्यो पनि आफ्नै प्रिय कलाकार राजेश हमालसँग ।
अभिनेता राजेश हमाल र नवनायिका बेनिशा हमालले चलचित्र 'ज्यान हाजिर छ' मा एकसाथ अभिनय गरेका छन् । यि दुई हमाल कलाकारको पहिलो भेट नै सोही चलचित्रको छायाँकनका क्रममा भएको हो । यि दुईको पहिलो फिल्मी भेट भने निकै गजबको रहेछ । राजेश हमालको ग्रेट फ्यान रहेको बताउने बेनिशाले चलचित्रको पहिलो सिनमा नै राजेशलाई किस गरिछन् त्यो पनि ८ पटक ।
आफ्नै प्रिय कलाकारलाई पहिलो भेटमै ८ पटक किस गर्न परेपछि बेनिशाको हालत कस्तो भयो होला ? बेनिशाले त्यो पल सम्झदै भन्छिन्, 'म त्यो दिन यति धेरै डराएकी थिएँ कि मैले के गरें भन्ने कुरा नै राम्रोसँग याद छैन । राजेश दादालाई किस गर्नपर्दा मेरो अनुहार एकदमै रातो भएको थियो ।' बेनिशाको अनुहार रातो हुँदा हमालको अनुहार कस्तो भयो होला त ? बेनिशा हाँस्दै भन्छिन्, 'उहाँको अनुहार पनि रातो भएको थियो ।' राजेश जि पनि डराउनु भएको भनि प्रश्न गर्दा बेनिशा भन्छिन्, 'डराएर हैन मेरो लिपिस्टिकले गर्दा रातो भएको ।'
राजेशलाई बेनिशाले जति पटक किस गर्थिन् त्यति नै पटक राजेशले ऐना हेरेर गालामा लागेको लिपिस्टिकको डाम हटाउँथे रे ! त्यो बेला राजेश पनि बेनिशा जस्तै केहि नर्भस भने भएका रहेछन् । त्यसैले त उनी केहि नबोली चुप लागेर गालामा लागेको लिपिस्टिकको डाम आँफै मेट्थे रे ! यता निर्देशक बद्री अधिकारी भने अरू कलाकारले एक सिनका लागि १५/१६ टेक लिने गरेको अनुभव सुनाउँदै बेनिशालाई किस गर्न लगाईरहँदा रहेछन् । बेनिशा भने तीन पटक सम्म त निर्धक्कका साथ किस गरिछन् तर तीन पटक पछिको टेकमा भने उनले किस गर्न निकै गार्हो मानिछन् । उनी भन्छिन्, 'पहिलो टेकमा ८ पटक किस गर्न परेको त्यो पल अब कहिल्यै बिर्सन्न ।'
दशैंको सेरोफेरोमा सार्वजनिक हुने तयारीमा रहेको चलचित्र 'ज्यान हाजिर छ' मा राजेश र बेनिशा दाजु बहिनीको अभिनय गरेका छन् । देशप्रेमको कथालाई लिएर निर्माण गरिएको सो चलचित्रमा राजेश र बेनिशाको साथमा काजोल खड्का, देशभक्त खनाल, सुमन वाग्ले, जुनु श्रेष्ठ, शुशिल श्रेष्ठ, विकास चापागाई, राजु लामा, प्रशन्न कपाली आदिको अभिनय रहेको छ ।
