प्रदर्शनको क्रम नजिकिंदै गर्दा निर्माता प्रदिप उदयले चलचित्र 'मालतीको भट्टी' को पोस्टर सार्वजनिक गरेका छन् । सामाजिक सञ्जाल फेसबुक मार्फत उनले चलचित्रका दुई पोस्टर सार्वजनिक गरेका छन् । सार्वजनिक गरिएका दुबै पोस्टरमा नायिका रेखा थापाको मात्र तस्विर राखिएको छ ।

केहि समय अगाडी सार्वजनिक गरिएको सो पोस्टरमा यो समाचार तयार पारूञ्जेल सम्म दुई दर्जनले कमेन्ट गरिसकेका छन् । अधिकांशले सफलताको शुभकामना दिएका छन् भने केहिले चलचित्र रिलिज कहिले हुन्छ भनि प्रश्न गरेका छन् । चलचित्रकी मुख्य नायिका रेखा थापा आफ्नै पोस्टर हेरेर दंगिएकी छिन् । उनले लेखेकी छिन्, 'wau really nice...i like this.......thx pradip dai..........' यस्तै नारायण श्रेष्ठले निर्माता उदयलाई रक्सि र सितन खान कहिले बोलाउने भनि प्रश्न गरेका छन् ।

रेखा थापा, जीवन लुइँटेल, नन्दिता केसी, अयुव केसी, सुनील थापालगायतको अभिनय रहेको सो चलचित्रमा नायिका थापा भट्टी वालीको भुमिकामा छिन् । काबिल फिल्मसको लागि ब्रदर्श इन्टरटेनमेन्टको प्रस्तुती रहेको चलचित्र 'मालतीको भट्टी' लाई गणेश देव पाण्डेले निर्देशन गरेका हुन् । नारायण कुमार पाण्डे 'काबिल', गंगा पौडेल र गोपाल पाण्डेले निर्माण गरेको सो चलचित्रमा संजय लामाको छायाँकन, रोशन श्रेष्ठको द्वन्द, रेनाशा राईको नृत्यनिर्देशन तथा कालीप्रसाद बाँस्कोटाको संगीत सुन्न सकिनेछ ।

यसै चलचित्रबाट निर्देशक गणेश देव पाण्डे र संगीतकार कालीप्रसाद बाँस्कोटाले डेब्यू गरेका हुन् । निर्देशक पाण्डे भारतमा निर्देशन सम्बन्धी कोर्स गरेर आएका निर्देशक हुन् भने संगीतकार बाँस्कोटाले यस अघि केहि एल्बमहरूमा भने संगीत भरिसकेका छन् ।