बद्रिनाथ बाबा प्रोडक्सनको व्यानरमा निर्माण गरिएको चलचित्र 'त्यो १० घण्टा' को आज मंगलबार गोपिकृष्ण हलमा प्रिमियर शो गरिंदैछ । आउँदो शुक्रबारबाट देशभर एकसाथ प्रदर्शनमा आउन लागेको सो चलचित्रको प्रिमियर शो साँझ ५ बजेबाट शुरू हुने बताईएको छ । प्रिमियर शोमा केहि चलचित्रकर्मी र सञ्चारकर्मीलाई निमन्त्रणा गरिएको छ ।
मकवानपुरका विभिन्न स्थानमा जम्मा १० दिनमा छायाँकन सकिएको सो चलचित्रमा रेजिना उप्रेती, एसराज, दिक्पाल कार्की, रीमा विश्वकर्मा, नमिता शर्मा लगायत १० जना कलाकारले मुख्य भूमिका निर्वाह गरेका छन् । चलचित्रकी नायिका नमिता शर्माको निर्माणमा युवा निर्देशक नितेश न्यौपानेले निर्देशन गरेको सो चलचित्रको कथा वाईके पाण्डेले लेखेका हुन् ।
संजय श्रेष्ठको संगीत, महेश गोदारको नृत्यनिर्देशन, रामशरण उप्रेतीको छायाँकन तथा राहुल केसीको सम्पादन रहेको सो चलचित्र थ्रिलर कथामा आधारित छ । अंक १० का थुप्रै संयोगहरु जोडिएको चलचित्र 'त्यो १० घण्टा' लाई निर्माण पक्षले उत्कृष्ट चलचित्र बनेको दाबी गर्दै आएको छ । यस अर्थमा मेरो गोरूको बार्है टक्का भन्ने उखान निर्माण युनिटमा लागु भएको छ । निर्माण पक्षले उत्कृष्ट चलचित्र बनेको दाबी गर्दै आए पनि सो चलचित्र कस्तो बनेको छ त्यो त हेरेपछि मात्र नै थाहा हुनेछ ।
