सञ्चारकर्मी, अभिनेता एवं निर्देशक दिनेश डिसी आफ्ना टेलिभिजन कार्यक्रम 'वाईवाई क्वीज' र 'एसियन पेन्ट्स खोजी प्रतिभाको' फाईनल गरेपछि एकाएक चलचित्रमा अभिनय गर्न व्यस्त भएका छन् । उनी अहिले चार नयाँ चलचित्रमा फरक फरक चार गेटअपमा अभिनय गर्दैछन् । एनबी महर्जनको 'पार्टनर', नीर शाहको 'मसान', सबिर श्रेष्ठको 'के म तिम्रो साथी बन्न सक्छु' र दिनेश शर्माको 'तिम्रो कसम' मा डिसी व्यस्त छन् ।
टेलिभिजनमा व्यस्त भएका बेला कम चलचित्रमा अभिनय गर्ने डिसी अहिले आफ्नै निर्देशनमा बन्ने भनिएको चलचित्र 'मायाज बार' को काममा पनि व्यस्त छन् । यसै चलचित्रबाट डिसीले आफ्नै टेलिभिजन कार्यक्रम खोजी प्रतिभाको बाट गायन बिधामा प्रथम भएकी गायिका दुर्गा परियारलाई पार्श्व गायनमा डेब्यू गराउँदैछन् । मायाज बार लगत्तै 'फूलै फूलको मौसम तिमीलाई' र 'ए ! पासाङ' को निर्देशन गर्ने बताउने डिसीले टेलिभिजन कार्यक्रमहरू नभएको अवस्थामा चलचित्रको काममा व्यस्त भएको बताए ।
अभिनयका लागि अन्य दुई चलचित्रमा अफर आएको भएपनि अब चलचित्रको निर्देशन गर्ने भन्दै यि चार चलचित्र पछि केहि समयका लागि अभिनयको कार्य रोक्ने डिसीले बताए । गत बर्ष टेलिभिजन कार्यक्रम र रंगमञ्चका कार्यक्रममा व्यस्त रहेका डिसीले यस बर्ष चलचित्रको निर्देशन र रंगमञ्चका कार्यक्रममा बढि व्यस्त हुने जानकारी गराए । आफूलाई आवाजको दुनियाँको साथी भन्न रूचाउने डिसीले यहि असार २२ गते हुन गईरहेको एजुकेशन अवार्ड, भाद्र २२ गते हुन गईरहेको डि सिने अवार्ड र भदौमा नै हुने गाईजात्रे कार्यक्रमको उदघोषण पनि गर्दैछन् ।
यस्तै भदौ १० गते हुन लागेको रिद्विसिद्वि ज्वलर्स फेस्टिभल र असोज ७ गते पोखरामा हुन लागेको कन्सर्टको उदघोषण पनि डिसीले नै गर्ने बताईएको छ । यसरी हरेक क्षेत्रमा सफल मानिएका डिसीलाई व्यस्त भएकोमा बधाई र सफलताको शुभकामना पनि ।
