नेपाल कलाकार संघको सहयोगार्थ चलचित्र पलको च्यारिटी शो गरिने भएको छ । बिहिबार साँझ ५ बजे चावहिल स्थित गोपिकृष्ण हलमा पलको च्यारिटी शो गर्न लागिएको हो । कलाकार संघको कोष बृद्धिका लागि गर्न लागिएको च्यारिटी शोमा ३००, ५०० र १००० को टिकट राखिएको छ ।
कसैलाई पनि टिकट अनिवार्य नगरिएको बताउदै निर्देशक रमेश बुढाथोकीले आफ्नै संघको कोष बृद्धिका लागी च्यारिटी शो गर्न लागिएकोले सबै कलाकारलाई चलचित्र हेरिदिन आग्ह गरेका छन् । साथै उनले कलाकार संघलाई सहयोग पुर्याउने उद्धेश्यले चलचित्र पलको च्यारिटीमा उपस्थित भै दिन सबै चलचित्रकर्मीलाई अनुरोध गरेका छन् ।
यता नेपाल जेसिसले चलचित्र पलको च्यारिटी देशभर गर्दै छ । जेसिसले अहिलेसम्म देशका २० भन्दा बढी स्थानमा चलचित्र पलको च्यारिटी गरीसकेको निर्देशक रमेश बुढाथोकीले जानकारी दिए । च्यारिटी शो गरेर उठेको पैसाको ६० प्रतिशत स्थानीय स्तरमा जेसिसले नै खर्च गरीरहेको समेत निर्देशक बुढाथोकीको भनाई छ ।
गोपीकृष्ण मुभिज र बुद्धमाया प्रोडक्सनको ब्यानरमा निर्माण भएको चलचित्र पलमा राजबल्लभ कोइराला, निशा अधिकारी, तृप्ती नाडकर, रमेश बुढाथोकी, धिरेन शाक्य, अनुप बराल, नीर शाह, बसुन्धरा भुषाल, महादेव त्रिपाठी, दिनेश डिसी, लय संगौला लगायतका कलाकारको साथमा अभिनेत्री करिष्मा मानन्धरको पनि बिशेष भुमिका रहेको छ । न्ह्यू बज्राचार्यको संगीत, किरण खरेलको गीत, राजु थापाको छायाँकन तथा रजनी पन्तको सम्पादन रहेको सो चलचित्रलाई राजु केसी, सुशिला शाक्य, चन्द्रमा राजकर्णिकार र उज्ज्वल पौडेलले निर्माण गरेका हुन् भने चलचित्रको प्रस्तुतकर्ता र लेखक कर्ण शाक्य हुन् ।
