हिन्दी चलचित्र देली बेली प्रदर्शन गरिरहेको गोपीकृष्ण सिनेमा हलबाट आईतबार साँझ प्रहरीले चलचित्र देली बेली लोड गरिएको हार्ड डिक्स लगेको खबर प्राप्त भएको छ । सेन्सर बोर्डले काट्न भनेका आपत्ती जनक दृष्यहरु नकाटी प्रदर्शन गरेको खबर फिल्मीखबर डटकमले प्रकाशित गरेपछि आज प्रहरीले यस्तो कदम उठाएको हो ।
हिन्दी चलचित्र देली बेली हेरे पछि सेन्सर बोर्डको कामलाई लिएर फिल्मीखबरले हिजो के हेर्दै छ सेन्सर बोर्ड ? भन्ने शिर्षकमा समाचार प्रकाशन गरेको थियो । त्यो समाचार प्रकाशनको २४ घण्टा बित्न नपाउदै बोर्डले सेन्सर गरेका दृष्यहरु नकाटी प्रदर्शन गरेको थाहा पाएपछि जिल्ला प्रशासन कार्यालयमा चलचित्र प्रदर्शनमा रोक लगाउन पत्र पठाएको थियो । सोही पत्रलाई आधार मान्दै प्रशासन कार्यालयले चलचित्र भवनमा पुगेर प्रदर्शन भईरहेको चलचित्र देली बेलीको हार्ड डिक्स लगेको स्रोतले बताएको छ । यसै गरी प्रहरीले बिग सिनेमाबाट पनि देली बेलीको प्रिन्ट लगेको स्रोतले बताएको छ ।
चलचित्र देली बेलीका हरेक दृश्य तथा संवादमा अपशब्दको प्रयोग गरिएको र दृष्यहरु समेत आपत्ति जनक छन् । तिनै दृश्य तथा संवादमा सेन्सर बोर्डले कैंची लगाउँदा लगाउँदै पनि सेन्सर लागेका दृश्य तथा संवाद नकाटी गत शुक्रबारबाट सार्वजनिक प्रदर्शन गरिएपछि जिल्ला प्रशासन कार्यालयले चलचित्र चल्न नदिई हार्ड डिक्स र प्रिन्ट खोसेको हो । सोमबारबाट देशभरका हलमा प्रदर्शन गर्न रोक लगाईने कुरा प्रशासनले बताए पनि आज साँझबाट नै उक्त चलचित्र चलिरहेका हलहरूमा प्रहरीले छापा मारिरहेको छ ।
