नायक निखिल उप्रेतीका दुई श्रीमती कोपिला उप्रेती र सञ्चिता लुईटेलबिच निखिललाई आफ्नो तिर तान्ने होडबाजी चलिरहेको छ । दुबैले निखिल आफूसँग मात्र बस्ने दाबी गर्दै आएका छन् तर पछिल्लो घटनालाई हेर्दा निखिल कोपिल तिर नजिकिएको बुझिएको छ ।
हिजो मात्र मुम्बईबाट काठमाण्डौ आईपुगेका निखिल आफ्नी पहिलो श्रीमती कोपिलाको साथमा रहेको पुष्टि भएको छ । कोपिलाको फेसबुकमा राखिएको तस्विरले यो पुष्टि गर्छ कि निखिल अहिले कोपिलासँग बसिरहेका छन् । तर सञ्चिता भने निखिल आफूलाई भेट्न आएको दाबी गरिरहेको स्रोत बताउँछ । सञ्चिता अहिले दुई जीउकी छिन् र आफ्नो हेरचारको लागी निखिल नेपाल आएको सञ्चिताले दाबी गरे पनि निखिल आफ्नो घर जानुले सञ्चितालाई खासै वास्ता नगरेको बुझिन्छ ।
फिल्मीखबरलाई प्राप्त जानकारी अनुसार निखिल आफ्नी श्रीमती कोपिला र छोराको साथमा बिहान पूजाआजा पनि गरेछन् । निखिल उप्रेती सञ्चितासँग नजिकिएको खबर सञ्चारमाध्यममा आईरहेकै बेला निखिल आफूसँग हुँदा कोपिला खुसी भएको स्रोतको भनाई छ । सञ्चिता भने निखिल कोपिलासँग बस्न नसक्ने दाबी गर्छिन् तर कसको मन भित्र पस्न को नै सक्छ र ? भनिन्छ नि तस्विर आँफै बोल्छ भनेर । अहिले प्रस्तुत तस्विरले यो पुष्टी गर्छ कि निखिल अझै पनि कोपिलालाई छोड्न चाहंदैनन् ।
कुरा यतिमा मात्र सिमित छैन । निखिल नेपाल आउनुको अर्को कारण पनि छ । त्यो हो नेपाली चलचित्रमा अभिनय गर्नु । करिब डेढ बर्ष अघि नेपाली चलचित्र उधोगलाई लात हानेर मुम्बई पसेका निखिल उप्रेतीको नेपाली चलचित्रमा अभिनय गर्ने रहर पुन: जागेको बुझिएको छ । स्रोतले बताए अनुसार उनी आफ्ना श्रीमतीलाई भेट्न मात्र नभएर नेपाली चलचित्रमा पनि अभिनय गर्न आएका हुन् । त्यसो भए अब के निखिल पुन: नेपाली चलचित्रमा राज गर्न सक्लान् त ? नेपाली चलचित्रमा काम गर्नु भन्दा मुम्बईमा भाँडा माझ्छु भन्दै मुम्बई पसेका निखिललाई नेपाली चलचित्रकर्मी र दर्शकले रि-इन्ट्री गर्न देलान् त ? हामी यसको प्रतिक्षामा छौं ।
