नायिका ऋचा घिमिरेको प्रस्तुतीमा निर्माण गरिएको चलचित्र 'ब्रेक फेल' कमेडी चलचित्र हो । यस चलचित्रमा मुख्य तीन पात्र ऋचा घिमिरे, निरज बराल र बिमलेश अधिकारी ठग पात्रको भुमिकामा प्रस्तुत भएका छन् । समाजमा भइरहेको ताजा घटनाहरूलाई पर्दा मार्फत प्रस्तुत गर्न खोजिएको बताउँदै प्रस्तुतकर्ता तथा नायिका घिमिरेले यो चलचित्र युवापुस्तालाई लक्षित गरि निर्माण गरिएको बताईन् ।
आगामी भाद्र १६ गते देशभर एकसाथ प्रदर्शन हुने भनिएको सो चलचित्रमा कारलाई पनि मुख्य पात्रको रूपमा प्रस्तुत गरिएको छ । यसका साथै यस चलचित्रमा राजेश हमाल, सुवास थापा, ममता प्रधान, शिवहरी कार्कीको साथमा नवप्रस्तुतीको रूपमा चिरन बिमली तथा मदन महतले अभिनय गरेका छन् । वर्ल्डवाईड मुभि मेकर्स प्रालिको व्यानरमा शंकर घिमिरे निर्देशित चलचित्र 'ब्रेक फेल' मा शिवहरी कार्की, मनोजकुमार घिमिरे तथा प्रदीप सिंहको पनि लगानी रहेको छ ।
सत्य-स्वरुप तथा द युनिटी ब्यान्डको संगीत रहेको यस चलचित्रको छायाँकन काठमाण्डौ उपत्यकाको साथमा चितवन र सुदूर पश्चिमका रमणिय स्थानमा गरिएको छ । हाल पोस्टप्रोडक्सनमा रहेको उक्त चलचित्र बिश्वका बिभिन्न मुलुकमा पनि प्रदर्शन गरिने भएको छ । नेपाली चलचित्रको इतिहासमा कमेडी चलचित्र खासै नबनेको र अहिलेका युवाले यस्तै चलचित्र खोजिरहेको अवस्थामा यो चलचित्रलाई दर्शकहरूले मन पराउनेमा निर्देशक घिमिरे बिश्वस्त छन् ।
