चर्चित लेखक बिकाश आचार्यले पहिलो पटक निर्देशन गरेको चलचित्र 'नसिब आफ्नो' शुक्रबारबाट राजधानीका एक दर्जन सिनेमा घरमा प्रदर्शन हुँदैछ । क्यू सिस्टमबाट प्रदर्शन हुन लागेको सो चलचित्रले दुई बर्ष अघि मोफसलमा औसत व्यापार गरेको थियो ।
दिलकुमार प्यासीले निर्माण गरेको चलचित्र ‘नसिब आफ्नो’ म बिराज भट्ट, रेखा थापा, जीवन लुईटेल, जेनिशा केसी, हेमन्त बुढाथोकी, सुब्रत आचार्य लगायतले अभिनय गरेका छन् । अभि फिल्म्स प्रोडक्सनको ब्यानरमा निर्माण भएको सो चलचित्र सामाजिक प्रेम कथामा आधारित छ । यसै चलचित्रबाट जीवन लुईटेल नेपाली चलचित्रमा स्थापित भएका हुन् भने उनले यस चलचित्रबाट ०६६ को केटिभी अवार्डमा नवनायकको अवार्ड पनि हात पारेका थिए । यसैगरी निर्देशक आचार्यले पनि सोही अवार्डमा नवनिर्देशकको अवार्ड हात पारेका थिए ।
निर्माता प्यासीको कथा र निर्देशक आचार्यको पटकथा तथा संवाद रहेको सो चलचित्रमा महेश खड्का र बसन्त सापकोटाको संगीत रहेको छ । यसैगरी चलचित्रमा कविराज गहतराजको नृत्य, शंकर विकासको द्धन्द्ध, रामशरण उप्रेतीको छायांकन रहेको छ ।
