माया गर्नु र माया पाउनु दुई फरक कुरा हुन् । मन लागे माया गर्न सकिन्छ तर आफुले चाहदैमा कसैको माया पाउन गाह्रो हुन्छ । त्यसैले होला चलचित्र श्रीमान् श्रीमती भन्दैछ तपाई आफुले चाहेको व्यक्तिसँग हैन आफुलाई चाहने ब्यक्तिसँग जीवन बिताउनुहोस । त्यो जीवन नै खुसमय, सफल र उदाहरणीय बन्न सक्छ ।
मुनाल घिमिरेद्वारा निर्मित चलचित्र श्रीमान् श्रीमती यहि भदौ २ गतेबाट देशभर एकैसाथ प्रदर्शन हुँदैछ । पारिवारिक प्रेमकथामा आधारित चलचित्र श्रीमान् श्रीमती त्रिकोणात्मक लभ स्टोरी चलचित्र हो जसलाई ऋषि लामिछानेले निर्देशन गरेका हुन् । श्रीमान् श्रीमती कसरी एकै रथका दुई पांग्रा अनि एक सिक्काका २ पाटा हुन् भन्ने बारे चलचित्र केन्द्रीत रहेको निर्माता घिमिरेको भनाई छ । उनका अनुसार आफुले निर्माण गरेको यस अघिको चलचित्र आफ्नो मान्छे आफ्नै हुन्छ भन्दा पनि यो चलचित्र उनलाई मन परेको चलचित्र हो ।
चलचित्रमा नायक श्रीकृष्ण श्रेष्ठ श्रीमानको रुपमा प्रस्तुत हुदैछन् भने उनकी श्रीमती स्वेता खड्का हुन् वा सरिता लामीछाने त्यो कुरा चलचित्र हेरी सकेपछि मात्र थाहा हुने निर्माता घिमिरेको भनाई छ । चलचित्रमा यि तीन कलाकारको साथमा मुकेश ढकालको पनि मुख्य भुमिका रहेको छ ।
