करिब तीन बर्ष अघि 'द युगदेखी युगसम्म' नामक चलचित्रमा नायक राजेश हमाललाई नयाँ गेटअपको साथमा नायिका नन्दिता केसीसँग चुम्बन गर्न लगाएर चर्चामा आएका निर्देशक दिपेन्द्र के. खनालले दोस्रो चलचित्र 'धर्मा' मा नायिका मनिषा कोईरालालाई अभिनय गराएर अर्को चर्चा बटुले । नेपाली चलचित्र क्षेत्रमा आश लाग्दा निर्देशकको रूपमा चिनिएका निर्देशक खनालले अहिले फेरि अर्को चर्चा बटुल्नेमा दुई मत छैन ।
हो, दिपेन्द्रले भर्खरै मात्र एउटा स्क्याण्डलमा परेकी मोडल बिनिता बराललाई आफ्नो चलचित्रबाट डेब्यू गराउँदैछन् । हल्ला नहोस् भन्ने हेतुले मिडियालाई थाहै नदिई दिपेन्द्रले निर्माणाधिन चलचित्र 'के म तिम्रो साथी बन्न सक्छु' बाट निकालिएकी मोडल बिनितालाई आफ्नो पछिल्लो चलचित्रबाट डेब्यू गराउन लागेका हुन् । राम्रो अभिनय क्षमता देखेर दिपेन्द्रले बिनितालाई आफ्नो चलचित्रबाट डेब्यू गराएको बुझिएको छ । उनले यसअघि अनु शाहलाई पनि डेब्यू गराएका थिए ।
फिल्मीखबरलाई प्राप्त जानकारी अनुसार दिपेन्द्रले निर्देशन गर्ने चलचित्रको नाम 'चपली हाईट' राखिएको छ । ५/६ दिन भित्रमा छायाँकन शुरू गर्ने भनिएको सो चलचित्रमा अभिनय गर्ने कलाकार अधिकांश नयाँ नै राखिएको बुझिएको छ । 'द युगदेखी युगसम्म' का निर्माता अर्जुन कुमारले निर्माण गर्ने भनिएको सो चलचित्रमा मिसन पैसाबाट डेब्यू नायक अमिर गौतम, बिनिता बराल, राज घिमिरे लगायतका कलाकारले अभिनय गर्दैछन् ।
