सुटिङ शुरू भएको कुरा नसुन्दै प्रोमो सार्वजनिक भएको सुन्दा अचम्म लाग्न सक्छ तर अचम्म मान्नु पर्दैन । किनकी यो कुरा सत्य हो कि निर्देशक प्रशन्न पौडेलले निर्देशन गर्ने भनिएको चलचित्र 'मेरो बेस्ट फ्रेण्ड' को सुटिङ सुरू नहुँदै प्रोमो सार्वजनिक गरिएको छ ।

निर्देशक पौडेलले सामाजिक सञ्जाल फेसबुक मार्फत आज आईतवार ५३ सेकेन्डको प्रोमो सार्वजनिक गरेका हुन् । साउनको अन्तिम साताबाट सुटिङ शुरू हुने भनिएको सो चलचित्रको प्रोमो सार्वजनिक गरेको केहि समयमा नै यो समाचार तयार पारूञ्जेल १८ जनाले प्रतिक्रिया जनाएका छन् भने २६ जनाले लाईक गरेका छन् । अधिकांशले प्रोमो राम्रो बनेको प्रतिक्रिया दिएका छन् भने केहिले प्रोमो हेरेर मात्र चलचित्रको जजमेन्ट गर्न नमिल्ने भन्दै पूरै चलचित्र हेरेर प्रतिक्रिया दिने बताएका छन् । त्यसैले केहिले निर्देशक पौडेलको सफलताको कामना समेत गरेका छन् ।

दुई जना साथीहरु जो एक अर्कालाई अति चाहन्छन् तर पनि उनिहरुको बिचमा बिवाह नहुन सक्छ भन्ने मान्यतालाई आधार मानेर निर्माण गर्न लागिएको चलचित्र 'मेरो बेस्ट फ्रेण्ड' का साथीहरु एक अर्काका लागि जन्मेको भए पनि कहिल्लै सँगै हुन सक्दैनन् भन्ने कुरा नै चलचित्रको कथाबस्तु भएको निर्देशक पौडेलको भनाई छ ।

आशाबादी फिल्मस् प्रालीको ब्यानरमा बन्न लागेको सो चलचित्रमा झरना बज्राचार्य, रेश मरहठ्ठा, दिवस उप्रेती लगायतले अभिनय गर्दैछन् । काठमाण्डौ आसपासका रमणिय स्थानहरूमा छायाँकन गर्ने भनिएको सो चलचित्रलाई बिदूर पाण्डेले खिच्ने छन् । अच्युत अधिकारीको कथा तथा संवाद रहने उक्त चलचित्रमा हिमाल केसीको द्धन्द्ध रहने छ ।

चलचित्र कोही मेरो पछि यस क्षेत्रबाट सन्यास लिएको बताउने नायिका झरना यसै चलचित्रबाट कमव्याक गर्दैछिन् भने निर्देशक पौडेल यो चलचित्रसँगै अर्को चलचित्र निर्देशन गरेपछि सन्यास लिने तयारीमा छन् । अब झरना जस्तै निर्देशक पौडेलले पनि सन्यास लिएको कुरा फिर्ता लिने हुन् या होईनन् त्यो भने हेर्न बाँकी नै छ । अहिलेलाई भने यो युनिटलाई सफलताको शुभकामना !


 

http://www.facebook.com/video/video.php?v=220278111341118&comments