मायाको बारीमा प्रितिको फूल, संगाली राखेको कुसुमे रुमाल...
एक जमानाको सफल चलचित्र जसले अहिले सम्म पनि आफ्नो सफलताको पहिचान छोडी नै रहेको छ । चलचित्र हो कुसुमे रुमाल । चलचित्रले राम्रो ब्यापार मात्र गरेन कि ति चलचित्रका गीत अमर नै बने । अझै पनि ति गीतको लोकप्रियता घटेको छैन । त्यहि चलचित्रको एउटा चर्चित गीत हो 'मायाको बारीमा प्रितिको फूल संगाली राखेको कुसुमे रुमाल...' ।

माथि उल्लेखित गीतलाई सम्झाई राख्न हो या नाम नै नपाएर हो गोपिकृष्ण मुभिजले चलचित्रको नाम सोही गीतबाट लिंदै आएको छ । गोपिकृष्ण मुभिजले कुसुमे रुमाललाई दाहोर्‍याउदै पछाडी २ थपेर कुसुमे रुमाल-२ बनायो । त्यति मात्र कहाँ हो र प्रितिको फूलबाट पनि चलचित्रको नामाकरण गरी चलचित्र बनी सकेको छ । त्यसैगरी अहिले फेरि सोही गीतबाट 'मायाको बारिमा' नामक चलचित्र बन्दैछ । बुझ्नमा आए अनुसार यसपछि गोपिकृष्णले संगाली राखेको नामक चलचित्र निर्माण गर्ने तयारी गर्दैछ ।
 

चलचित्रको 'मायाको बारिमा' को सुटिङ युनिट आउने सोमबार देखि छायाँकनमा जाने बताइएको छ । कहिले के त कहिले के बहानामा रोकीएको यो चलचित्र पछिल्लो समय यस चलचित्रबाट डेब्यु गर्ने भनीएका नायक मोहित आचार्यका कारण रोकीएको थियो । बरिष्ठ कलाकार हरीबंश आचार्यका सुपुत्र मोहितले आफ्नी आमाको निधन पछि एक वर्ष चलचित्र नखेलने बताएका कारण अन्यौलमा रहेको युनिटले अहिले भने हिरो परिवर्तन गरेर छायाँकन गर्न लागेको हो ।

दयाराम दहालले निर्देशन गर्ने भनीएको उक्त चलचित्रमा अब मोहितको ठाँउ एसराज आउने भएका छन् । अर्थात चलचित्र मायाको बारीमा मायाका बिरुवा रोप्न एसराज आउँदै छन् । स्वर, त्यो दश घण्टा, सन्त्रास लगायतका चलचित्रमा अभिनय गरीसकेका नायक एसराजलाई मायाको बिरुवा रोप्न सघाउने छन् नायिका केकी अधिकारीले । यसअघि स्वरमा संगै काम गरेर पनि रोमान्स गर्न नपाएको यो जोडीले चलचित्र मायाको बारीमामा भने रोमान्स गर्न पाउने भएको छ । महानायक राजेश हमाल र नायिका करिष्मा मानन्धरले समेत अभिनय गर्ने भनीएको यस चलचित्रमा ताराप्रकाश लिम्बुको संगीत रहने छ ।