आई लभ यू टु निर्माण गर्ने भनेर अन्तिम तयारीमा रहेको सेन्चुरी फिल्म्सले अन्तत आएर 'पुरानो हुदैन माया' नामक चलचित्रको निर्माण कार्य शुरू गरेको छ । कलाकार कमलकृष्णले अन्तिम समयमा आएर निहु खोजेपछि निर्माता निर्मल सेन्चुरीले दिपक श्रेष्ठलाई लिएर 'पुरानो हुदैन माया' को निर्माण कार्य शुरू गरेका हुन् ।
कमलकृष्णले चलचित्र निर्देशन गरे वापत भारी रकम मागेको र चलचित्रको १५ % शेयर मागेकाले दिन नसके पछि सेन्चुरीले दिपकलाई लिएको बताए । सेन्चुरीले निर्मान गर्ने भनेको चलचित्र आई लभ यू टु लाई रेखा फिल्म्सले ४ लाख क्षतिपूर्ती तिरेर रावण नाममा निर्माण गर्दै छ भने सेन्चुरीले 'पुरानो हुदैन माया' नाम दर्ता गरेर आज सोमबारबाट छायाँकन शुरू गरेका छन् ।
काठमाण्डौको अनामनगर स्थित नूतन स्टुडियोमा पुजाआजा गरेर छायाँकन शुरू गरिएको सो चलचित्रमा शिब श्रेष्ठ, सिर्जना बस्नेत, निर्मल सेन्चुरी, सुमिना घिमिरे, जीया केसी, हेमन्त बुढाथोकी लगायतले अभिनय गर्दैछन् । सन्दिप भुषाल निर्माता रहेको सो चलचित्रमा नविन रावल र कोसिस क्षेत्रीको संगीत, शिबम् अधिकारीको लेखन, कविराज र शंकर बिसीको नृत्य तथा देव महर्जनको द्वन्द रहेको छ । काठमाण्डौ, पोखरा र दाङमा छायाँकन गरिने सो चलचित्र त्रिकोणात्मक प्रेमकथामा आधारित रहेको निर्माता तथा नवनायक निर्मल सेन्चुरीले बताए ।
