खराब मौसमका कारण लामो समय देखि जोमसोम जान नसकेको चलचित्र 'अन्दाज' को युनिट अन्तत: जोमसोम पुगेको छ । आईतवार काठमाण्डौबाट जोमसोमका लागी हिडेको करिब तीस जनाको टोली सोमबार पोखराहुँदै जोमसोम पुगेको हो ।
एक महिना अघि लगातारको बर्षाका कारण म्याग्दी जोमसोम सडक खण्डमा पहीरो गएका कारण त्यस तर्फ जान नसकेको युनिट हवाई उडान मार्फत त्यस तर्फ जान लागेको थियो । तर हवाई उडान पनि हुन नसकेपछि सुटिङ एक महिनाका लागि सारिएको हो । एक महिनाको बिश्राम पछि आजबाट जोमसोममा चलचित्र 'अन्दाज' को सुटिङ धमाधम भईरहेको छ ।
अहिले नृत्यनिर्देशक कविराज गहतराजले नायिका रेखा थापा र नवनायक सबिन श्रेष्ठलाई जोमसोमको चिसोमा नचाईरहेका छन् । करिब दश दिनको सेड्यूल राखेर जोमसोम पुगेको युनिटले त्यहाँ एउटा गीत र केहि सिन खिच्ने छ । जोमसोमबाट फिल्मीखबरसँग कुरा गर्दै नायक जीवन लुईटेलले मौसमले धोका नदिए १० दिनमा काठमाण्डौ फर्कने बताए ।
रेखा थापा, जीवन लुईटेल र सबिन श्रेष्ठको मुख्य भुमिका रहेको चलचित्र 'अन्दाज' लाई उज्ज्वल घिमिरेले निर्देशन गर्दैछन् भने सो चलचित्रका निर्माता छबिराज ओझा, अशोक शर्मा र उज्ज्वल घिमिरे हुन् । चलचित्रलाई दशैंमा रिलिज गर्ने बताईएको छ ।
