नायक निरज बरालले आज चलचित्र 'ब्रेक फेल' को डबिङ गरेर आफ्नो जन्म दिन मनाउँदै छन् । बुवा नरेन्द्र बराल र आमा निरु बरालको कोखबाट झापाको भद्रपुरमा जन्मिएका निरजले आफ्नो जन्मदिनका दिन डबिङमा व्यस्त हुने र साँझ साथीहरूसँग बसेर रमाईलो गर्ने बताए ।
२८ औ जन्मदिन मनाउँदै गरेका बरालले आज सबेरै मन्दिरको दर्शन गरेको जनाएका छन् । मन्दिरबाट फर्कीएर घर परिवारसंग बिहानको खानासंगै खाएर काममा निस्केको बताउँदै निरजले आजका लागी अन्य कुनै योजना नभएको बताए । उनले भने, 'त्यस्तो योजना केही बनाएको छैन तर साँझ साथीहरूलाई बर्थ डे ट्रिट त दिनै पर्छ ।' बेलुका साथीहरुको लागी कतै पार्टी गर्ने उनले जनाए ।
सन् २००६ मा फिलिपिन्समा भएको मिस्टर युनिभर्सिटी इन्टरनेश्नलमा २८ देशको प्रतिस्पर्धिलाई उछिनेर उपाधि जितेका यि नायकले त्यसपछि केही बिज्ञापनहरुमा अभिनय गरेका थिए । उनले अभिनय गरेको बिज्ञापन हेरेर नै कुसुमे रुमालबाट अफर आएको निरजले बताए । आज भन्दा ३ वर्षअगाडी चलचित्र कुसुमे रुमालबाट अभिनय यात्रा थालेका निरजले यो बिचमा चार चलचित्रमा अभिनय गरिसकेका छन् ।
निरजले अभिनय गरेका दुई चलचित्रहरु कुसुमे रुमाल र दिप शिखा प्रदर्शन भैसकेका छन् भने चलचित्र ब्रेक फेलको डबिङ आज सकाउँदै छन् । त्यस्तै निरज अभिनित अर्को चलचित्र हो 'फूल' । यो पनि प्रदर्शनको क्रममा छ । यस्तै बरालले शिब रेग्मीको निर्माणधिन चलचित्र पराइमा अभिनय गर्दैछन् । आज ब्रेक फेलको काम सकाएर भोली उनी पराइ हुन लागी पोखरा जानेछन् । त्यसो त निर्देशक सुरेश दर्पण पोखरेलको चलचित्रमा पनि उनी अनुबन्धित भैसकेका छन् ।
आज परेको जन्मदिनका अवसरमा यो वर्ष सामाजीक कार्यमा सक्रिय भएर लाग्ने प्रतिबद्धता निरजले व्यक्त गरेका छन् । आफु सामाजीक संसथामा आवद्ध भए पनि सक्रिय भएर काम गर्न नसकेको बताउदै निरजले यो वर्ष भने चलचित्र, अध्ययन र सामाजीक कार्यलाई संग संगै अगाडी बढाउने जनाएका छन् । निरजलाई फिल्मीखबरको तर्फबाट जन्मदिनको अवसरमा हार्दिक मंगलमय शुभकामना !
