दुई प्रेमिकाहरूको द्वन्दात्मक प्रेम कथामा आधारित रहेर निर्माण गर्न लागिएको चलचित्र 'SNOW FLOWERS' (हिउँका फूलहरू) को बुधबार मुहुर्त गरियो । सुवर्ण थापाको निर्देशनमा बन्न लागेको सो चलचित्रको मुहुर्त सोही चलचित्रका कलाकार तथा प्राबिधिकले संयुक्त रूपमा पूजापाठ गरेर गरे । मानवीय संवेदना, दुबिधा, संकोच र खोजको ढिक्कोको संज्ञा दिईएको सो चलचित्रको छायाँकन बिहिबारबाट गरिंदै छ ।

कथाका दुई पात्रले आफ्नो अस्तित्वको संघारमा स्वयं पग्लिएर हाम्रो समय कालको चित्रण गरेको चलचित्र 'SNOW FLOWERS' मा नायिकाद्वय निशा अधिकारी र दिया मास्के प्रमुक भुमिकामा छन् । आईडिया एण्ड ईमेजेजको ब्यानरमा बन्न लागेको चलचित्र 'SNOW FLOWERS' मा निशा र दियाको साथमा सौगात मल्ल, लक्ष्मी गिरी, बिएस राणा, भारती घिमिरे, निशा शर्मा लगायतका कलाकारहरूले अभिनय गर्दैछन् । यसका साथै नायक राजबल्लभ कोईराला र नायिका नम्रता श्रेष्ठ पनि यस चलचित्रमा बिशेष अतिथीको भुमिकामा देखिंदै छन् ।

यस अघि 'मलामी' नामक छोटो चलचित्र निर्माण गरेका निर्देशक थापाले चलचित्र 'SNOW FLOWERS' गर्भमा रहेको र यसलाई सकुशल जन्म दिने प्रतिबद्वता व्यक्त गरे । हिंउँमा फुलेको सेतो फूल जस्तो कथा रहेको भन्दै निर्देशक थापाले नेपाली चलचित्रमा यस चलचित्रले एउटा फड्को मार्ने दाबी समेत गरे ।

सुसन प्रजापतिले निर्माण गर्न लागेको सो चलचित्रलाई फ्रान्सेली महिला सारा कोर्नुले खिच्दै छिन् । कुटुम्ब, सुजित, आशिष र नताशाको गीतसंगीत रहने उक्त चलचित्रमा फ्रान्सेली महिला सिलभाँ मोरिजेको पार्श्व संगीत रहने भएको छ । चलचित्रको अधिकांश भागको छायाँकन काठमाण्डौमा गरिने भएको छ ।