नारीहरुको महान पर्ब हरितालिका तिजको अवसर पारेर इजरायलमा नेपाली कथानक चलचित्र 'सायद' को प्रिमियर हुने भएको छ । ओएस नेपाल डटकमले आयोजना गर्न लागेको सो प्रिमियर समारोहमा चलचित्रकी नायिका झरना थापा र नायक तथा निर्माता सुनिल रावल उपस्थित हुने भएका छन् ।
आगामी सेप्टेम्बर २ तारिखका दिन इजरायलको हाहागाना स्थित बेइत बार्बर हलमा एक बिशेष साँगितीक कार्यक्रम सहित चलचित्र सायदको प्रिमियर गर्न लागिएको हो । इजरायलमा प्रिमियर गरे लगत्तै यो चलचित्र अन्य मुलुकमा पनि प्रदर्शन हुने भएको छ । नेपालमा भने यो चलचित्र माघ महिना तिर प्रदर्शन हुने भएको छ ।
दुई पुस्ताको जीवनकथा र ड्रग्स समस्यालाई आधार मानेर निर्माण गरिएको चलचित्र 'सायद' लाई सुरज सुब्बा 'नाल्बो' ले निर्देशन गरेका हुन् । दुर्गिस फिल्मसको ब्यानरमा अनिल रावलले निर्माण गरेको यस चलचित्रमा झरना थापा, सुनिल रावल, संयम पुरी, अनिता दाहाल, विल्सन विक्रम राई, ऋतिका लामा, दिनेश रावलको साथमा अभिनेत्री करिष्मा मानन्धर र नायक बाबु बोगटी बिशेष भुमिका निर्वाह गरेका छन् ।
निर्देशक सुब्बाकै कथा रहेको सो चलचित्रमा न्यूह बज्राचार्य, स्याडोज ब्यान्ड, बाबु बोगटी र अराज केशवले संगीत दिएका छन् । चलचित्रमा गोबिन्द राई र अराज केशबको कोरियोग्राफी, संजय लामाको सिनेमाटोग्राफी रहेको छ ।
