कलाकार हुँदै चलचित्र निर्देशनमा हात हालेका राजु गिरी एक पछि अर्को चलचित्र निर्देशनमा ब्यस्त हुन थालेका छन् । चलचित्र दिलमायाबाट राम्रो प्रशंसा पाएपछि राजुले त्यस लगत्तै २ चलचित्रको निर्देशन गरे । डिजिटल चलचित्र 'खतरनाक जंगल' बाट निर्देशनमा हात हालेका गिरीले अहिले अर्को चलचित्र निर्देशन गर्दैछन् ।
चलचित्र चन्द्रावती, हत्याकाण्ड, मै राम्री जस्ता चलचित्र निर्देशन गरेपछि अहिले उनी रक्षा नामको चलचित्रमा काम गर्दै छन् । राजेश हमालको डेट फाइनल हुन बाँकी रहेको बताउदै गिरीले हमालले समय दिए १६ गतेबाट नै छायाँकन शुरू गर्ने जानकारी दिएका छन् । एक जना नायिकाको छनौट हुन बाँकी रहेको बताउने गिरीले अर्की नायिका भने भेटेका छन् । यसअघि चलचित्र हत्याकाण्डबाट डेब्यु गरेकी नायिका सारिका घिमिरेलाई नै उनले यो चलचित्रमा पनि दोहोराउने भएका छन् ।
पवन बस्नेतले निर्माण गर्ने चलचित्र रक्षामा प्रकाश धितालले स्कृप्ट लेखेका छन् । रामेश्वर कार्कीले क्यामेरामा दृष्यहरु कैद गर्ने छन् । रोशन श्रेष्ठले कलाकारको बिचमा लर्डाई गराउने छन् भने कबिराजले कम्मर मर्काउन लगाउने छन् । यसअघिका चलचित्रमा जस्तै यसपटक पनि राजुको चलचित्रमा संगीत अर्जुन पोखरेलले दिने भएका छन् । नेपालको समसामयिक राजनीतिलाई मुख्य विषय बनाइएको सो चलचित्रको छायाँकन काठमाडौं तथा पोखरामा हुने बताईएको छ ।
