भारतमा बडिगार्ड चलचित्र चल्ने बेला नेपालमा निर्माता शुसिल पोखरेलले नेपाली चलचित्र बडिगार्डका लागी नायिकाको खोजी गरिरहेका छन् । नयाँ अनुहारलाई पहिलो प्राथमिकतामा राख्ने भन्दै शुसिलले नायिकाको खोजी गरेको बताए ।
फिल्मीखबरकै माध्यमबाट बडिगार्डका लागि नायक भेटेका शुसिलले पुन: फिल्मीखबरबाट नै नायिकाको आह्वान गरेका छन् । हेर्दा साधारण लाग्ने पढे लेखेकी र अभिनय गर्न सक्ने राम्री युवतीको खोजीमा रहेको शुसिलले फिल्मीखबरलाई बताए । तिहार सकिए लगत्तै सुटिङ शुरू गर्ने बताएका शुसिलले ब्रेक दिने नायिकालाई उचित पारिश्रमिक समेत दिने बताए । उनले भने, 'मेहनत अनुसारको पारिश्रमिक दिन म हिच्किचाउँदिन ।'
चलचित्रकी मुख्य नायिकासँगै उनले सह नायिकाको पनि खोजी गरेका छन् । नेपाली चलचित्र क्षेत्रमा सक्षम नायिका भए पनि नयाँ अनुहारलाई पनि प्रवेश गराउनु पर्ने भएकाले नायिका खोजेको शुसिल बताउँछन् । चलचित्रका मुख्य नायक असलन उर्फ आकाश शाह पनि नयाँ नै भएकाले नायिका पनि नयाँ राख्न लागेको उनको भनाई छ । बडिगार्डका नायक आकाश शाह अहिले मुम्बईमा अभिनयको कोर्ष गरिरहेका छन् ।
चलचित्रको कथा नायिकाको वरिपरि नै घुम्ने भएकाले शुसिल सक्षम नायिकाको खोजीमा छन् । एक्सन प्रधान चलचित्र बनाउने बताएका शुसिलको चलचित्र 'बडिगार्ड' लाई राजेन्द्र उप्रेतीले निर्देशन गर्नेछन् । निर्माता पोखरेलकै कथा रहेको सो चलचित्रको पटकथा र संवाद शिबम अधिकारीले लेखेका छन् ।
