चाड पर्व आएपछि कलाकारहरु बिभिन्न कार्यक्रमको सिलसिलामा बिदेश जाने गर्दछन् । खासगरी नयाँ वर्ष, दशै लगायत बिभिन्न चाड पर्वहरुको अवसर पारेर बिदेशमा आयोजना हुने यस्ता कार्यक्रमहरुमा सहभागिता जनाउदा कलाकारले आर्थिक उन्नती पनि राम्रै गर्ने गर्दछन् ।

चलचित्र विकास बोर्डले सुटिङ नै रोकेर नायिकाहरुलाई दर खुवाउन लागे पनि नायिका करिष्मा मानन्धर भने तीज मनाउन बिदेश जाने भएकी छिन् । पछिल्लो समय छोरीसँगै क्याटवाक गरेर चर्चामा आएकी यि नायिकाले यो वर्षको तीज मलेसियामा रहेका नेपालीहरु सँग मनाउदै छिन् । तीजको अवसरमा मलेसियामा रहेका नेपालीहरुको बिचमा कार्यक्रम प्रस्तुत गर्न नायिका मानन्धर आज राती त्यस तर्फ उड्दै छिन् । सेप्टेम्बर २ तारिखका दिन मात्र नेपाल र्फकने जानकारी दिदै करिष्माले मलेसियामा रहेका नेपालीहरुसँग रमाइलो साथ तिज मनाउने बताईन् ।

एक महिना अगाडी देखि नै दर खाने कार्यक्रमहरु सुरु भैसकेकोले त्यस्ता कार्यक्रमहरुमा सहभागिता जनाउदा जनाउदै मोटाइएलाकी भन्ने डर लागेको करिष्माले बताईन् । उनले आज पनि केही दर खाने कार्यक्रमहरुमा उपस्थित हुने बताईन् । उनले आफु सँगैको टिममा केही समय अघि सम्म बिश्वका सबैभन्दा होचा ब्यक्तिको रुपमा गिनीज बुकमा नाम लेखाउन सफल खगेन्द्र थापा मगर र करियोग्राफर गोबिन्द राई जाँदै छन् ।
 

तीजमा नाचगान गरेर रमाइलो गर्ने गरेको स्मरण गर्दै करिष्माले यो तीजमा मलेसियामा रहेका नेपालीहरुसँग नाचगान गर्ने बताएकी छन् । एक हप्ते मलेसिया बसाईका क्रममा बिभिन्न स्थानमा ४ वटा स्टेज शोहरुमा सहभागिता जनाउने बताउँदै करिष्माले उक्त शोहरूमा चलचित्रको सम्झनाको 'कहाँ होला कस्तो होला..' बोलको गीतमा आकर्षक नृत्य प्रस्तुत गर्ने भएकी छिन् । सो गीतको करियोग्राफी गोबिन्द राईले गरेका हुन् ।

यसैगरी नायिका नन्दिता केसी पनि आज राति नै मलेसिया जाँदै छिन् । उनी पनि तीजको बिशेष कार्यक्रममा सहभागी हुन मलेसिया जान लागेकी हुन् । करिब एक साताको लागि मलेसिया जान लागेकी नन्दिताले स्टेज शोमा कन्टेम्प्रोरी डान्स गर्ने छिन् । जसका लागि उनले एक महिना देखि प्रशान्त तामाङसँग बिशेष क्लास पनि लिएकी थिईन् ।

रिमिक्स धमाका ३ नाम दिईएको साँस्कृतिक कार्यक्रममा नन्दिताको साथमा मेरिबास्यैका कलाकार सिताराम कट्टेल, कुञ्जना घिमिरे र केदार घिमिरे गायक प्रमोद खरेल लगायतको प्रस्तुती रहने नन्दिताले बताईन् । करिष्मा र नन्दिता एकैसाथ मलेसिया जान लागेको भएपनि प्रस्तुती भने फरक फरक ठाउँमा हुनेछ ।
 

मलेसिया जानु अघि करिष्मा र नन्दिताले फिल्मीखबर मार्फत सम्पूर्ण नारीहरुमा हरितालिका तीजको शुभकामना ब्यक्त गरे । तिजलाई भब्य र सभ्य रुपमा रमाइलोसँग मनाउन उनीहरूले शुभकामना ब्यक्त गरेका हुन् ।