खासगरी चलचित्र पत्रकारको परिचय बोकेका निर्देशक सुमन दाहाल दोस्रो चलचित्र निर्देशनका लागी थाइल्याण्ड जाने कार्यक्रम केही दिनका लागी स्थगित भएको छ । सुमनले दिएको जानकारी अनुसार चलचित्र 'यो मन' को छायाँकन १५ दिन पछि धकेलिएको छ ।
सम्पूर्ण छायाँकन थाइल्याण्ड गरिने यो चलचित्रको युनिटका लागि वर्क प्रमिट नआए पछि सुटिङ पछि धकेलिएको हो । भदौको १५ गतेबाट सुटिङ आरम्भ गर्ने भनिए पनि वर्क प्रमिटका कारण ढिला भएको सुमनले जानकारी दिए । आफु चलचित्रको लागी यस अगाडी २ पटक सम्म थाइल्याण्ड गएर लोकेशन फाइनल गरेको बताउदै सुमनले ३५ दिनको सुटिङ सेडुयल रहे पनि ४५ दिनको प्याकेजमा जान लागेको जानकारी गराए ।
रेड क्यामराले खिचिने चलचित्र बैंककमा १० दिन, वाइङमा १० दिन र फुकेटमा १५ दिन छायाँकन गरिने सुमनले बताएका छन् । उनका अनुसार चलचित्रलाई रेड क्यामराको माध्यमबाट बिष्णु र दिब्य सुबेदीले खिच्ने छन् । निखिल उप्रेती, नन्दिता केसी, बर्षा राउत लगायतका कलाकारहरुले अभिनय गर्ने चलचित्र 'यो मन' लाई युनाइटेड पिर्क्चर्सको प्रस्तुतीमा मोहन पन्तले निर्माण गर्ने छन् ।
निर्माता पन्त थाईल्यैण्डका नै भएकाले चलचित्रको सुटिङ पनि सोही ठाउँमा गर्न लागिएको हो । सुटिङको सम्पूर्ण व्यवस्था उनले नै मिलाएको सुमनको भनाई छ । सुरेश अधिकारी र सरोज प्याकुरेलको संगीत रहेको चलचित्र 'यो मन' पारिवारिक लभ स्टोरी चलचित्र भएको निर्देशक दहालले बताए ।
