लाईट कमेडी चलचित्र 'ब्रेक फेल' को बिहिबार राजधानीमा ग्र्याण्ड प्रिमियर गरियो । कमलपोखरी स्थित कुमारी सिनेमा घरमा पाँच सय भन्दा बढि चलचित्रकर्मी र सञ्चारकर्मीका माझ चलचित्रको ग्रिन कार्पेट प्रिमियर गरिएको हो ।
चलचित्र हेरिसके पछि उपस्थित सबै चलचित्रकर्मीले ब्रेक फेल राम्रो चलचित्र बनेको प्रतिक्रिया दिए । नायक भुवन केसी, आर्यन सिक्देल, राजबल्लभ कोईराला, नायिका रेखा थापा, अरूणिमा लम्साल, रेजिना उप्रेती लगायतका कलाकार तथा निर्माता निर्देशकहरूले चलचित्रको खुलेर प्रशंसा गरे । उनीहरूले चलचित्रको मेकिङ, प्रस्तुती शैली र कलाकारको अभिनय राम्रो भएको बताएका थिए । उनीहरूले यस्तो चलचित्र चल्नुपर्ने बताए ।
प्रिमियर समारोहमा मुख्य भुमिकामा रहेका नायक राजेश हमाल बाहेक सबै कलाकार उपस्थित थिए । सबैले प्रशंसा गरेपछि कलाकार तथा प्राबिधिकहरू निकै खुसी देखिन्थे । नायिका ऋचा घिमिरेको प्रस्तुतीमा शंकर घिमिरेले निर्देशन गरेको चलचित्र 'ब्रेक फेल' आज शुक्रबारबाट देशभरका सिनेमा घरहरूमा लाग्दैछ । डिजिटल सिनेमा नेपालले बितरण गर्न लागेको चलचित्र 'ब्रेक फेल' बाट मा राजेश हमाल, ऋचा घिमिरे, निरज बराल, बिमलेश अधिकारी, सुवास थापा, चिरन बिमली, मदन महत, ममता प्रधान, पुष्कर भट्ट, शिबहरी कार्की लगायतले अभिनय गरेका छन् ।
वर्ल्ड वाईड मूभि मेकर्सको ब्यानरमा शिबहरी कार्की, मनोज कुमार घिमिरे र प्रदिप सिंहले निर्माण गरेको सो चलचित्रमा सत्यस्वरूप र दि युनिटीको संगीत रहेको छ । साथै चलचित्रमा राजु थापाको सिनेमाटोग्राफी, रेनाशा राईको करियोग्राफी र सानु कुमारको द्वन्दनिर्देशन रहेको छ । चलचित्रको छायाँकन काठमाण्डौ र चितवनको साथमा सुदूर पश्चिमको भर्जिन लोकेशनमा गरिएको छ ।
