नेपालीहरूको दोस्रो महान पर्व तिहारलाई लक्षित गरेर प्रदर्शन हुन लागेको चलचित्र 'हाम्रो माया जुनी जुनीलाई' को प्रचारप्रसार शुरू गरिएको छ । यसै क्रममा निर्माण युनिटले फिल्मीखबर डटकमबाट सो चलचित्रको गीत प्रिमियर गरेको छ ।
काबिल फिल्मका लागि ब्रदर्श इन्टरटेन्मेन्टको प्रस्तुती रहेको चलचित्र 'हाम्रो माया जुनी जुनीलाई' को उक्त गीतमा महेश खड्काको संगीत रहेको छ । महेश खड्काकै शब्दमा राजेश पायल राई र अञ्जु पन्तको स्वर रहेको उक्त गीतमा मुकेश ढकाल र नीता ढुंगानाले अभिनय गरेका छन् । गीतको करियोग्राफी गोबिन्द राईले गरेका हुन् ।
प्रदिप उदयको प्रस्तुतीमा नारायण कुमार पाण्डे 'काबिल', गंगा पौडेल र गोपाल पाण्डेले निर्माण गरेको चलचित्र 'हाम्रो माया जुनी जुनीलाई' पूर्ण रूपमा प्रेमकथामा आधारित छ । ऋषि लामिछानेले निर्देशन गरेको सो चलचित्रमा श्रीकृष्ण श्रेष्ठ, रेखा थापा, मुकेश ढकाल, नीता ढुंगाना, सुनिल थापा लगायतले अभिनय गरेका छन् । चलचित्रमा महेश खड्काको संगीत, गोबिन्द राईको नृत्य, रोशन श्रेष्ठको द्वन्द तथा संजय लामाको छायाँकन रहेको छ ।
चलचित्रका निर्माता प्रदिप उदयले गीतको प्रिमियरसँगै नायिकाको पनि खोजी गरेको बताए । आफ्नो महत्वाकांक्षी एक चलचित्रका लागि करिब १६ बर्षको उमेरकी नायिका खोजिरहेको उदयले फिल्मीखबरलाई जानकारी गराए । छिट्टै नै चलचित्रको निर्माण थालनी गर्ने बताउँदै निर्माता उदयले सो चलचित्रमा अभिनय गर्न चाहनेले आफूलाई सम्पर्क गर्न सकिने बताए ।
हाम्रो माया जुनी जुनीलाई...
