चलचित्र 'पराई' ले छायाँकन सकिएको अवसरमा आज मंगलबार इण्डक्ल्याप पार्टीको आयोजना गर्यो । सिमीत चलचित्रकर्मी र सञ्चारकर्मी उपस्थित सो पार्टीमा युनिटले औपचारिक रूपमा सुटिङ सकिएको जानकारी गरायो । गत श्रावण महिनाको ३ गते सुटिङ शुरू गरेको सो चलचित्रको छायाँकन मंगलबार मात्र सकिएको हो ।
चलचित्रको इन्डक्ल्याप पार्टीमा बोल्दै निर्देशक शिब रेग्मीले चलचित्र 'पराई' ले मान्छे भित्रको मान्छेलाई बुझ्ने बताए । नारी संवेदनामा आधारित नारी मनोविज्ञानमा आधारित चलचित्र 'पराई' मा संवाद भन्दा बढि भावको प्रयोग भएको निर्देशक रेग्मीको भनाई थियो । चलचित्रमा मुख भन्दा बढि मन बोलेको बताउँदै रेग्मीले भने, 'यस चलचित्रको बिषय र प्रस्तुतिकरणले दर्शकको मन छुनेछ ।'
क्रियटिभ फिल्म्स प्रोडक्सनको व्यानरमा दिपक शाहीले निर्माण गरेको सो चलचित्रमा नन्दिता केसी, निरज बराल, गोबिन्द शाही, गरिमा पन्त, अभिनब 
रेग्मी, बसुन्धरा भुषाल, लक्ष्मी गिरी, देशभक्त खनाल, दिपक शाही, बिष्णु सापकोटा, रामचन्द्र अधिकारी, उत्तम केसी, जयप्रकाश रिजाल, सुरेशदर्पण पोखरेल, कोपिला थापा, सुजल लामिछाने (बालकलाकार) को साथमा राजबल्लभ कोईराला र रेजिना उप्रेतीले बिशेष अतिथीको भुमिका निर्वाह गरेका छन् ।
शिब रेग्मी र शिबम अधिकारीको लेखन रहेको चलचित्र 'पराई' मा बसन्त सापकोटाको संगीत, शम्भु सापकोटाको छायाँकन, हिमाल केसीको द्वन्द, कविराज गहतराज र राजु शाहको नृत्य रहेको छ ।
