बिगत १४ बर्ष देखि राजेश हमालको सहयोगी भएर काम गरेका रोशन हमालले चलचित्र निर्देशन गर्दैछन् । उनको चलचित्र 'रङ' मा राजेशले अभिनय नगर्ने खबर केहि सञ्चारमाध्यममा आए पनि उनी अतिथी भुमिकामा देखिने पक्का नै छ ।

केहि मिडियामा चलाईएको हल्ला अनुसार रोशन र राजेश बिच मनमुटाव भएर चलचित्र छोडेको कुरामा सत्यता नभएको खुल्नमा आएको छ । चलचित्रको शुरूवात एक म्यागजिनमा छापिएको राजेशको फोटोबाट नै हुने फिल्मीखबरले पत्ता लगाएको छ । करिब दुई बर्ष अगाडी नै चलचित्रको कथा तयार पारिएको र मुख्य भुमिकामा राजेशले अभिनय गर्ने हल्ला चलेको भएपनि अन्तिम समयमा आएर राजेश अतिथी भुमिकामा मात्र देखिन लागेको कुरा फिल्मीखबरलाई प्राप्त भएको छ ।

रोशन हमाल

फिल्मीखबरसँग कुरा गर्दै रोशनले आफूहरूको सम्बन्ध सधैं सुमधुर रहिरहने बताए । उनले भने, 'राजेश दाईलाई त म भगवान मान्छु । हाम्रो सम्बन्धमा कहिल्यै दरार आएको छैन र आउँदैन पनि ।' रोशनले यस्ता हल्लाको पछाडी नलाग्न आग्रह समेत गरेका छन् । राजेशले आफ्नो चलचित्र छोडेको भन्ने कुराको खण्डन गर्दै रोशनले भने, 'दाईले अतिथी भुमिका निर्वाह गर्दै हुनुहुन्छ ।' राजेशका अर्का सहयोगी चिरञ्जिबी आचार्यले पनि राजेश चलचित्र 'रङ' मा अतिथी भुमिकामा देखिन लागेको बताए ।

 

यता लामो समय देखि सहयोगीको भुमिका निर्वाह गर्दै आएका रोशन चलचित्र निर्देशनमा व्यस्त भएपछि हमालको पूर्ण कार्यभार अब चिरञ्जिबीले सम्हाल्ने भएका छन् । यस अघि राजेशको हरेक कामको निर्णय रोशनले गर्ने भए पनि अब भने राजेशको हरेक कामको निर्णय पनि चिरञ्जिबीले नै गर्ने भएका छन् । तर पनि रोशनले राजेशबाट टाढा भने नरहने बताए ।