केहि दिन अगाडी चलचित्र 'म तिम्रो भईसकें' को प्रिमियरका लागी अष्ट्रेलिया पुगेका नायक जीवन लुईटेलले केही साथीभाई र आफ्नी जीवन संगिनीको साथमा कंगारूको देश अष्ट्रेलियामा आफ्नो जन्मदिन सेलिब्रेट गर्ने भएका छन् । आजकै दिन बिराटनगरमा जन्मेका जीवनले फिल्मीखबरसँग कुरा गर्दै आफ्नो बर्थ डे स्पेशल हुने बताए ।
सन् २००२ का मिस्टर नेपाल जीवनले बिहानै अष्ट्रेलियामा रहेको शिब मन्दिरमा पुगी दर्शन गरेको बताउँदै बेलुका आफ्ना नजिकका साथीहरूलाई डाकेर जन्मदिन सेलिब्रेट गर्ने योजना बनाएको समेत बताए । गएको बर्ष पनि अष्ट्रेलियामा नै जन्मदिन मनाएका जीवनले नेपालका साथीभाई तथा आफन्तलाई भने मिस गरिरहेको बताए । सानो संसार, मेरो एउटा साथी छ हुँदै चलचित्र क्षेत्रका प्रवेश गरेका जीवनले आफ्नो उमेर भने लुकाए ।
हिजो देखि नै फेसबुक अकाउण्टमा बर्थ डे विस गर्ने साथीभाई, आफन्त तथा शुभचिन्तकहरूलाई धन्यवाद दिंदै जीवनले आगामी दिनमा अझ राम्रो काम गरेर देखाउने प्रतिबद्वता व्यक्त गरे । आफ्ना शुभचिन्तकहरूको माया यसै गरी सधैं पाउने आश गर्दै जीवनले जन्मदिनको अवसरमा प्रदर्शन हुन लागेका आफ्ना चलचित्रहरू हेरिदिन आग्रह समेत गरेका छन् । चलचित्र हेरी कमेन्ट गरिदिन समेत उनले आफ्ना शुभचिन्तकहरूलाई आग्रह गरे ।
जीवनले अभिनय गरेका दुई चलचित्र 'म तिम्रो भईसकें' र 'अन्दाज' दशैंको अवसर पारेर सार्वजनिक हुँदैछन् । चलचित्र 'म तिम्रो भईसकें' असोज १३ गतेबाट मोफसलका सिनेमा घरहरूमा लाग्दै छ भने चलचित्र 'अन्दाज' असोज १६ गतेबाट मोफसलका सिनेमा घरमा र असोज २० गतेबाट राजधानीका सिनेमा घरहरूमा लाग्दैछ । चलचित्र 'म तिम्रो भईसकें' सेप्टेम्बर महिनाको अन्तिम साता तिर अष्ट्रेलियामा पनि रिलिज हुँदैछ ।
यसैगरी उनको अर्को दुई चलचित्र 'मालतीको भट्टी' र 'जब जब माया बस्छ' पनि छिट्टै नै रिलिज हुँदैछ । अष्ट्रेलियाको एक महिनाको बसाइ पछि जीवन नेपाल आएर चलचित्र 'ब्ल्याक मेल' मा व्यस्त हुनेछन् । फिल्मीखबर डटकमको तर्फबाट जीवनलाई प्रदर्शनको क्रममा रहेका चलचित्रको सफलताको कामनासँगै जन्मदिनको पनि हार्दिक शुभकामना !
