निर्देशक बिकास आचार्यले नायक जीवन लुईटेल र नायिका ऋचा सिंह ठकुरीलाई फेरी अर्को प्रोजेक्टमा दोहोर्याउने भएका छन् । जीवन र ऋचाको कामबाट सन्तुष्ट देखिएका बिकासले आगामी चलचित्र 'तिमी मेरी बन्नु ल' मा यो जोडीलाई नछोड्ने बताए ।
'नाइ नभन्नु ल' र 'म तिम्रो भईसकें' मा देखिएको यो जोडीको केमेष्ट्री मिलेर नै निर्देशक आचार्यको नजरमा अरू कलाकार बस्न सकेका छैनन् । हाल स्क्रिप्टको काम भईरहेको सो चलचित्रमा म तिम्रो भईसकेंका केहि अन्य कलाकार पनि दोहोरिने भएका छन् । चलचित्रको कथाबस्तु म तिम्रो भईसकेंसँग लिङ्क भएकाले पनि कलाकारलाई दोहोर्याउन लागेको आचार्यको भनाई छ ।
'नाइ नभन्नु ल' मा ऋचालाई ब्रेक दिएका निर्देशक आचार्यले 'तिमी मेरी बन्नु ल' मा पनि एक नायिकालाई ब्रेक दिने बताए । अहिले चलचित्रका लागि नायिकाको खोजी भईरहेको उनको भनाई छ । अब बन्ने चलचित्र पनि पूर्ण रूपमा प्रेमकथामा नै आधारित हुने बताउँदै आचार्यले लिन लागेको नव नायिका चलचित्रको मुख्य कलाकार नै हुने बताए ।
चलचित्रको कथा आँफै लेखिरहेका आचार्यले यस पटक गीत पनि आँफैले लेखेका छन् । चलचित्रको गीतसंगीत राम्रो बन्नुपर्छ भन्ने मान्यता राख्ने आचार्यले यस पटकको गीत पनि बिगतका चलचित्रका गीत भन्दा कम नहुने बताए । यसपटक पनि संगीतकारमा बसन्त सापकोटालाई नै लिने उनको योजना छ । निर्देशक आचार्य सहित सम्पूर्ण टिमलाई फिल्मीखबरको तर्फबाट प्रदर्शनको क्रममा रहेको चलचित्र 'म तिम्रो भईसकें' को सफलताको कामनासँगै आगामी प्रोजेक्टको पनि सफलताको कामना !
