अमेरिकामा नेपालीहरूले भोग्नु परेको दुःख, कष्ट तथा पीडालाई आधार मान्दै निर्देशक नारायण पुरीले चलचित्र 'ए फर अमेरिका' को निर्माणकार्य शुरू गरेका छन् । लामो समयको अन्तराल पछि चलचित्र निर्देशनमा हात हालेका पुरीले गत बिहिबारबाट सुटिङ शुरू गरेका हुन् ।
अहिले चलचित्रको सुटिङ काठमाण्डौमा धमाधम भईरहेको छ । चलचित्रको आधा भाग नेपाल र आधा भाग अमेरिकामा छायाँकन गरिने भएकाले नेपालको भाग सके पछि युनिट तिहार अगावै अमेरिका प्रस्थान गर्नेछ । रेखा थापा, राजबल्लभ कोईराला, केकी अधिकारी, सन्तोष पन्त, नीर शाह, सुनील थापा, भरत सिटौला लगायतले अभिनय गर्दैछन् । यसका साथै अमेरिकामा रहेका केही कलाकारले पनि अभिनय गर्ने बताईएको छ ।
करिब २० दिनको समय लिएर अमेरिका प्रस्थान गर्ने टोलीमा निर्देशक नारायण पुरी, निर्माता हिक्मत मियाँ, नायिकाद्वय रेखा थापा र केकी अधिकारी, नायक राजबल्लभ कोईराला र पाका कलाकार सन्तोष पन्त रहने छन् । बाँकी कलाकार र प्राबिधिक अमेरिकाकै रहने बताईएको छ । हरेक नेपालीको सपनाको केन्द्र बिन्दु बनेको देश अमेरिका जान किन मरिहत्ते गर्छन् ? त्यहाँ पुगेपछि कस्ता कस्ता समस्या आउँछन् ? नेपाल छोडेर अमेरिका पलायन भएका कलाकारको अवस्था कस्तो छ ? लगायतका समस्याहरूलाई चित्रण गरिने सो चलचित्रको कथा मनोज बाबु पन्तले तयार पारेका हुन् ।
एसिया प्यासिफीक फिल्म प्रोडक्शन र अमेरिकाको अवार्ड प्रोडक्शनको संयुक्त ब्यानरमा निर्माण भइरहेको सो चलचित्रका निर्माता हिक्मत मियाँ हुन् । गीत तथा द्वन्द नसमेटिने सो चलचित्रलाई रामेश्वर कार्कीले खिचिरहेका छन् । अमेरिकामा भने अमेरिकन छायाँकारले नै चलचित्रका दृश्यलाई क्यामेरामा कैद गर्ने बताईएको छ ।
