नेपाली चलचित्रकर्मीहरू भगवानलाई धेरै बिश्वास गर्ने गरेको पाईन्छ । आफूले निर्माण तथा निर्देशन गरेका चलचित्र होस् या आफ्नो भविष्यको सफलताका लागि होस् उनीहरू मन्दिर जाने, भाकल गर्ने गर्दछन् । यिनै मध्येका एक निर्देशक सुदर्शन थापा पनि हुन् जो अहिले मनकामना पुगेका छन् ।
प्रदर्शोन्मुख चलचित्र 'मेरो लभ स्टोरी' को सफलताका लागि निर्देशक थापा आईतवार मनकामना पुगे । मनकामना पुगी उनले मनकामना मातालाई बोका चडाएर आफ्नो चलचित्रलाई सफल बनाई दिन भगवानसँग बिन्ती चढाए । निर्देशक थापाले मात्र हैन निर्माता सुरज आचार्यले पनि चलचित्र सफल होस् भनि भगवानलाई प्राथना गरे । फिल्मीखबरसँग कुरा गर्दै निर्माता आचार्यले चलचित्र निर्माणक्रमका बेलानै भाकल राखेकाले मनकामना पुगी सो भाकल पूरा गरेको बताए ।
लभ स्टोरीको मात्र हैन निर्देशक थापाले आफ्नो अपकमिङ प्रोजेक्टको सफलताको लागि पनि भगवानसँग आशिर्वाद थापे । भाकलका लागि मनकामना पुगेको टोलीमा निर्देशक थापा, निर्माता आचार्य र उनको परिवार तथा नायिका शुष्मा कार्की रहेका छन् । दिउँसो पूजा आजा गरेको यो टोली भोली काठमाण्डौ फर्कदै छ ।
आफ्नै होम प्रोडक्सनमा सुरज आचार्यसँग मिलेर निर्माण गर्न लागेको अपकमिङ प्रोजेक्टमा निर्देशक थापाले नायक आर्यन सिग्देल र नायिका शुष्मा कार्कीलाई लिने बताएका छन् । चलचित्रको छायाँकन ०६८ को अन्त्य तिर शुरू गरिने भएको छ । चलचित्र पूर्ण प्रेमकथामा आधारित हुने समेत निर्देशक थापाले बताए । चलचित्र 'के यो माया हो' मा आर्यन र शुष्माको केमेस्ट्री मिलेको भन्दै पुन: अर्को चलचित्रमा दोहोर्याएको निर्देशक थापाको भनाई छ ।
